پاکستان کی ثالثی سے ایران اور امریکہ کا مذاکراتی عمل مسلسل آگے بڑھ رہا ہے، اسماعیل بقائی

ایرانی وزارت خارجہ کا کہنا ہے کہ پاکستان کی مخلصانہ ثالثی کے ذریعے ایران اور امریکہ کے مابین سفارتی مذاکراتی عمل مسلسل کامیابی سے آگے بڑھ رہا ہے۔

ایرانی وزارت خارجہ کے ترجمان اسماعیل بقائی نے کہا ہے کہ پاکستان کی مخلصانہ ثالثی اور کوششوں سے جاری ایران اور امریکہ کا مذاکراتی عمل مسلسل اور مثبت انداز میں آگے بڑھ رہا ہے۔

ترجمان نے میڈیا کو تفصیلات بتاتے ہوئے بتایا کہ ایرانی اور عمانی تکنیکی ٹیموں نے گزشتہ ہفتے سلطنت عمان کے دارالحکومت میں ایک انتہائی اہم ملاقات کی ہے۔

اس اعلیٰ سطح کی ملاقات میں خاص طور پر آبنائے ہرمز میں بحری جہازوں کی محفوظ آمدورفت کے لیے ایک جدید اور مربوط نظام وضع کرنے پر تفصیلی بات چیت کی گئی ہے۔

اسماعیل بقائی نے واضح کیا کہ ایران اس پورے معاملے پر عمان اور خطے کے تمام متعلقہ فریقین کے ساتھ مسلسل اور قریبی رابطے میں ہے۔

یہ بھی پڑھیں : متحدہ عرب امارات کو معلوم ہونا چاہیے کہ ایران کے صبر کی بھی ایک حد ہے، محسن رضائی

ایرانی وزارت خارجہ کے ترجمان نے دنیا کو امن کا پیغام دیتے ہوئے دوٹوک الفاظ میں کہا کہ ایران کی خطے کے کسی بھی ملک، بشمول متحدہ عرب امارات کے ساتھ، کوئی ذاتی یا سفارتی دشمنی نہیں ہے اور ایران سب کے ساتھ اچھے تعلقات چاہتا ہے۔

ان کا کہنا تھا کہ ایران اور امریکہ دونوں نے حالیہ سفارتی تجاویز پر اپنے اپنے باقاعدہ ردعمل اور تبصرے ایک دوسرے کو ارسال کر دیے ہیں جن کا جائزہ لیا جا رہا ہے۔

ترجمان نے اعادہ کیا کہ ہمیں خطے کے برادر اسلامی اور ہمسایہ ممالک سے کوئی مسئلہ یا تنازعہ درپیش نہیں ہے اور امریکہ کے ساتھ تمام تر پش پردہ مذاکرات صرف اور صرف پاکستانی ثالثی کے مرہون منت اور اسی کے ذریعے جاری ہیں۔

ترجمان ایرانی وزارت خارجہ نے اپنے روایتی مؤقف کو دہراتے ہوئے کہا کہ امریکہ اور اسرائیل کی جارحانہ پالیسیاں اس پورے خطے کے امن اور سلامتی کے لیے سب سے بڑا اور مستقل خطرہ ہیں، جبکہ ایران اپنے تمام ہمسایہ ممالک کے ساتھ کسی قسم کی کوئی دشمنی نہیں رکھتا اور خطے میں امن کا خواہاں ہے۔