عیدالاضحیٰ پر بجلی کی لوڈشیڈنگ سے متعلق اہم اعلان سامنے آگیا

لاہور الیکٹرک سپلائی کمپنی (لیسکو) نے اعلان کیا ہے کہ عید کے دنوں میں صارفین کو بجلی کی لوڈشیڈنگ کا سامنا نہیں کرنا پڑے گا اور پورے ریجن میں بجلی کی مسلسل فراہمی یقینی بنائی جائے گی۔

لیسکو کے چیف ایگزیکٹو انجینئر محمد رمضان بٹ نے کہا ہے کہ شدید گرمی کے باوجود عیدالاضحیٰ کے دوران صارفین کو بلا تعطل بجلی فراہم کرنے کے لیے تمام ضروری انتظامات مکمل کر لیے گئے ہیں۔ عید کے موقع پر لیسکو کے زیر انتظام کسی بھی علاقے میں لوڈشیڈنگ نہیں کی جائے گی۔

انہوں نے کہا کہ بجلی کی فراہمی کو بہتر بنانے کے لیے فیلڈ اسٹاف کو ہائی الرٹ کر دیا گیا ہے تاکہ کسی بھی خرابی کی صورت میں فوری کارروائی کی جا سکے۔ اگر کسی علاقے میں اوور لوڈنگ یا تکنیکی خرابی کے باعث ٹرانسفارمر جل جاتا ہے تو اسے فوری طور پر تبدیل کیا جائے گا تاکہ صارفین کو زیادہ دیر تک پریشانی کا سامنا نہ کرنا پڑے۔

سی ای او لیسکو نے کہا کہ کمپنی نے اوور بلنگ، بجلی چوری اور نئے کنکشنز کی فراہمی میں تاخیر جیسے مسائل پر بھی سخت اقدامات کیے ہیں۔ صارفین کی شکایات کے فوری ازالے کے لیے متعلقہ عملے کو خصوصی ہدایات جاری کر دی گئی ہیں۔

حکام کے مطابق گرمیوں کے موسم میں بجلی کی طلب میں نمایاں اضافہ ہو جاتا ہے، تاہم اس کے باوجود لیسکو نے سسٹم کو مستحکم رکھنے کے لیے پیشگی اقدامات کیے ہیں۔ اس مقصد کے لیے مختلف علاقوں میں بجلی کے نظام کی نگرانی بھی بڑھا دی گئی ہے۔