امریکہ بالادستی کیلئے عالمی قوانین توڑنے کو تیار، مستقبل کی جنگیں اے آئی سے لڑنے کا پلان

ڈارپا نے مستقبل میں لڑی جانے والی جنگوں کے حوالے سے ہولناک بلیو پرنٹ تیار کر لیا، اس منصوبے کے تحت روایتی جنگی قوانین کو پس پشت ڈال کر جدید ترین ٹیکنالوجی کا سہارا لیا جائے گا۔

ڈونلڈ ٹرمپ کے پینٹاگون کی جانب سے تیار کردہ مستقبل کی جنگوں کے اس ہولناک منصوبے کو چھ بڑے ستونوں میں تقسیم کیا گیا ہے۔

اس میں سب سے پہلا حصہ مصنوعہ ذہانت کا ہے، جس کے تحت ایسے خودکار ہتھیار اور روبوٹک نظام تیار کیے جا رہے ہیں، جو انسانی مداخلت کے بغیر خود ہی ہدف کا انتخاب کر کے حملہ کرنے کی صلاحیت رکھیں گے۔

دوسرے نمبر پر حیاتیاتی مینوفیکچرنگ ہے، جس کا مقصد لیبارٹریوں میں مصنوعی جاندار اور مہلک مالیکیولز تیار کر کے انہیں حیاتیاتی ہتھیاروں کے طور پر استعمال کرنا ہے۔

تیسرا ستون لاجسٹک نیٹ ورک کی فراہمی کا ہے، جس میں روبوٹس کی مدد سے سپلائی چین کو برقرار رکھا جائے گا۔ چوتھا ستون کوانٹم بالادستی کا ہے، جس کے ذریعے سیکیورٹی نیٹ ورکس اور بڑے پیمانے پر سائبر حملے کیے جا سکیں گے۔

یہ بھی پڑھیں : امریکہ پر چین کی برتری اب ایک واضح حقیقت بن چکی ہے، کٹر امریکی ناقد کا اعتراف

پانچواں ستون ڈائریکٹڈ انرجی کا ہے، جس میں تیز رفتار لیزر اور مائیکرو ویو ہتھیاروں سے سیٹلائٹس اور بنیادی انفراسٹرکچر کو اندھا اور ناکارہ بنایا جائے گا۔

چھٹا ستون ہائپرسونک سٹرائیک سسٹمز کا ہے، جو دفاعی نظاموں کو چکمہ دے کر پلک جھپکتے ہی تباہی مچانے کی صلاحیت رکھتے ہیں۔

ماہرین کا کہنا ہے کہ پینٹاگون عالمی سطح پر امریکی بالادستی کو برقرار رکھنے کے لیے کسی بھی حد تک جانے کو تیار ہے، کیونکہ اس بالادستی کے خاتمے سے امریکی اشرافیہ کی دولت، طاقت اور اثر و رسوخ کو ناقابل تلافی نقصان پہنچنے کا اندیشہ ہے۔

ماضی کی تاریخ گواہ ہے کہ امریکہ نے ہمیشہ اپنی اسٹریٹجک برتری کے لیے تمام عالمی قوانین کو توڑا ہے، جس کی مثالیں جاپان پر ایٹمی حملے، ویتنام میں زہریلی جڑی بوٹیوں کا استعمال، اور سربیا و عراق میں تباہ کن یورینیم کا استعمال ہیں۔

موجودہ دور میں ڈارپا کی حیاتیاتی عزائم، یوکرین اور اسرائیل میں پیلانٹیر کی مصنوعی ذہانت سے لیس کیمیائی ڈرون طیاروں کی تعیناتی، اور اسرائیل کی مدد سے کی جانے والی خفیہ تخریب کاری اور سیاسی ٹارگٹ کلنگز اس بات کا واضح ثبوت ہیں کہ اب مستقبل کی جنگیں بغیر کسی اصول اور قانون کے لڑی جائیں گی۔