امریکی اسٹاک مارکیٹ کی بڑی تباہی کا وقت قریب آ گیا، معاشی ماہر کی وارننگ

معروف مالیاتی ماہر نے خبردار کیا ہے کہ صدر ٹرمپ کی انتظامیہ کے خوف سے امریکی کمپنیوں کے سربراہان خاموش ہیں اور اعتماد ختم ہوتے ہی مارکیٹ فوری طور پر تباہ ہو جائے گی۔

معروف مالیاتی کالم نگار اینڈریو روس سورکن نے ایک انٹرویو میں بتایا کہ امریکہ کی بڑی کمپنیوں کے سربراہان موجودہ ٹرمپ انتظامیہ پر تنقید کرنے سے شدید خوفزدہ ہیں۔

انہوں نے واضح کیا کہ یہ کاروباری شخصیات اس بات سے ڈرتی ہیں کہ اگر انہوں نے حکومت کی کسی پالیسی پر بات کی تو انتظامیہ ان پر حملے کر سکتی ہے، ان کے کاروبار پر سخت قوانین نافذ کیے جا سکتے ہیں یا پھر مختلف سرکاری اداروں کے پاس موجود ان کے کاروباری انضمام اور معاہدوں کی منظوری روک دی جائے گی۔ یہی وجہ ہے کہ تمام بڑے تاجر حکومت کی کسی بھی کارروائی پر بولنے سے گھبرا رہے ہیں۔

یہ بھی پڑھیں : امریکہ اور چین کے درمیان کوانٹم کمپیوٹر کو جنگی ہتھیار بنانے کی دوڑ تیز

جب کالم نگار سے پوچھا گیا کہ کچھ ماہرین کے مطابق صدر ٹرمپ اپنی کامیابی کو اسٹاک مارکیٹ کی کامیابی سے جوڑتے ہیں، اس لیے وہ 1929 جیسے بڑے معاشی بحران کو دوبارہ کبھی نہیں آنے دیں گے اور عوام کو خود کو محفوظ سمجھنا چاہیے، تو انہوں نے جواب دیا کہ یہ اندازہ لگانا بہت مشکل ہے کہ چیزیں کب اور کیسے کنٹرول سے باہر ہو جاتی ہیں۔

انہوں نے انگلیوں سے چٹکی بجاتے ہوئے اشارہ کیا کہ جیسے ہی مارکیٹ سے سرمایہ کاروں کا اعتماد ختم ہوتا ہے تو معیشت سیکنڈوں میں زمین پر آ گرتی ہے۔

اینڈریو روس سورکن نے، جنہوں نے اس موضوع پر لکھی جانے والی کتاب پر تقریباً دس سال لگائے ہیں، حتمی طور پر تصدیق کی کہ امریکی مارکیٹ کا کریش ہونا بالکل طے ہے، اگرچہ وہ اس تباہی کا دقیق وقت اور اس کی گہرائی نہیں بتا سکتے لیکن وہ پوری یقین دہانی سے کہہ سکتے ہیں کہ ایک بڑا معاشی بحران بہت جلد امریکہ کو اپنی لپیٹ میں لے لے گا۔