کویت میں امریکی افواج پر ایرانی ڈرونز کا نیا حملہ ناکام بنانے کا دعویٰ

سینٹکام کا کہنا ہے کہ کویت میں امریکی افواج کو نشانہ بنانے کے لیے بھیجے گئے ایرانی ڈرونز کی ایک اور نئی لہر کے حملے کو کامیابی سے ناکام بنا دیا گیا ہے۔

امریکی فوج کی سینٹرل کمانڈ (سینٹکام) نے دعویٰ کیا ہے کہ ایرانی ڈرونز کی ایک اور نئی لہر نے کویت میں موجود امریکی افواج کو نشانہ بنانے کی کوشش کی تھی، لیکن اس حملے کو پوری طرح ناکام بنا دیا گیا ہے۔

سینٹکام کا کہنا تھا کہ امریکی فضائی دفاعی نظام نے بروقت کارروائی کرتے ہوئے فضا میں ہی متعدد ایرانی ڈرونز کو کامیابی سے مار گرایا اور اس بات کو یقینی بنایا کہ اس حملے میں کسی بھی امریکی اہلکار یا فوجی اثاثے کو کوئی نقصان نہ پہنچے۔

یہ بھی پڑھیں : امریکی فوج نے پانچویں بیڑے کے ہیڈکوارٹر پر ایرانی حملوں کا دعویٰ مسترد کر دیا

یہ تازہ ترین حملہ ایرانی پاسداران انقلاب کے اس بیان کے بعد سامنے آیا ہے، جس میں انہوں نے رات کے وقت قشم جزیرے پر ہونے والے امریکی حملے کے انتقام میں کویت اور بحرین میں امریکی فوجی اثاثوں اور اڈوں کو نشانہ بنانے کا دعویٰ کیا تھا۔

اس سے قبل امریکی فوج نے بدھ کی صبح قشم جزیرے پر قائم ایک ایرانی گراؤنڈ کنٹرول اسٹیشن پر اپنے دفاع میں فضائی حملہ کرنے کا اعتراف بھی کیا تھا۔