ایران پر حملہ مؤخر ہوتے ہی تیل کی قیمتوں میں بڑی کمی

امریکا کی جانب سے ایران پر ممکنہ فوجی کارروائی مؤخر کیے جانے کے بعد عالمی تیل مارکیٹ میں نمایاں تبدیلی دیکھنے میں آئی ہے۔

عالمی میڈیا رپورٹس کے مطابق امریکی صدر ڈونلڈ ٹرمپ کے حملہ مؤخر کرنے کے فیصلے کے بعد مشرقِ وسطیٰ میں کشیدگی میں کمی کی امید پیدا ہوئی۔ اسی وجہ سے عالمی توانائی مارکیٹ پر دباؤ کم ہوا اور خام تیل کی قیمتیں مسلسل دوسرے روز بھی نیچے آ گئیں۔

مارکیٹ اعداد و شمار کے مطابق برینٹ خام تیل کی قیمت میں 1.21 ڈالر فی بیرل کمی ہوئی، جس کے بعد یہ 89.17 ڈالر فی بیرل کی سطح پر آگیا۔ اسی طرح امریکی ویسٹ ٹیکساس انٹرمیڈیٹ (WTI) خام تیل کی قیمت بھی 1.23 ڈالر کم ہو کر 86.48 ڈالر فی بیرل پر ٹریڈ کرتا رہا۔

رپورٹس کے مطابق ہفتہ وار بنیادوں پر بھی تیل کی قیمتوں میں کمی دیکھی گئی۔ برینٹ خام تیل تقریباً 4.2 فیصد جبکہ ویسٹ ٹیکساس انٹرمیڈیٹ خام تیل 4.4 فیصد سستا ہوا۔ اس کمی کو عالمی منڈی کا فوری ردعمل قرار دیا جا رہا ہے۔