ڈیرہ بگٹی میں نامعلوم افراد کی پانی کے ٹینکر پر فائرنگ سے ڈرائیور اور ہیلپر جاں بحق

ڈیرہ بگٹی میں مسلح افراد نے ایک واٹر بوزر پر اندھا دھند فائرنگ کر دی، جس کے نتیجے میں گاڑی کا ڈرائیور اور ہیلپر دونوں موقع پر ہی جاں بحق ہو گئے۔

بلوچستان کے ضلع ڈیرہ بگٹی کے پیرکوہ ڈیرہ بگٹی روڈ پر نامعلوم مسلح افراد نے ایک پانی کے ٹینکر کو نشانہ بنایا۔ پولیس حکام کے مطابق نامعلوم ملزمان نے واٹر بوزر پر اندھا دھند فائرنگ کی، تاحال حملے کی وجوہات معلوم نہیں ہو سکیں۔

یہ بھی پڑھیں : خیبرپختونخوا : طوفانی بارشوں کے باعث مختلف حادثات میں 7 افراد جاں بحق

سیکیورٹی ذرائع اور پولیس نے تصدیق کی ہے کہ فائرنگ کے نتیجے میں گاڑی کا ڈرائیور اور اس کا ہیلپر دونوں شدید زخموں کی تاب نہ لاتے ہوئے موقع پر ہی جاں بحق ہو گئے۔

واقعے کی اطلاع ملتے ہی پولیس کی بھاری نفری جائے وقوعہ پر پہنچ گئی ہے اور لاشوں کو ضروری کارروائی کے لیے اسپتال منتقل کر دیا گیا ہے جبکہ علاقے کی ناکہ بندی کر کے ملزمان کی تلاش شروع کر دی گئی ہے۔