کیا آپ کویت میں کاروبار کرنا چاہتے ہیں، 15 سالہ رہائشی ویزہ بھی ملے گا مگر کیسے؟ مکمل تفصیلات جانیں

کویت نے غیر ملکی سرمایہ کاروں کو ملک میں متوجہ کرنے کے لیے ایک نیا اور طویل المدتی اقامتی نظام متعارف کروا دیا ہے۔

 اس نئی پالیسی کے تحت اہل سرمایہ کاروں کو 15 سال تک کا رہائشی پرمٹ جاری کیا جا سکے گا۔ یہ نیا نظام کویتی کابینہ کی قرارداد نمبر 651 برائے 2026 کے تحت نافذ کیا گیا ہے۔

 اس پالیسی کی تفصیلات سرکاری گزٹ "کویت الیوم” میں جاری کی گئی ہیں۔ فریم ورک میں سرمایہ کاروں کی مالی حیثیت، کاروباری سرگرمیوں اور قانونی تقاضوں کی مکمل جانچ کو لازمی قرار دیا گیا ہے۔

نئے نظام کے مطابق سرمایہ کاری کمپنیوں کے مالکان، شراکت داروں اور سینئر ایگزیکٹوز کو رہائشی سہولت دی جا سکے گی۔ اس کے ساتھ ان کے قریبی اہل خانہ بھی اس اقامتی نظام سے فائدہ اٹھا سکیں گے۔ صرف وہی افراد اہل ہوں گے جو مقررہ معیار پر پورا اتریں گے۔

اقامتی اجازت حاصل کرنے کے لیے سخت مالی شرائط بھی مقرر کی گئی ہیں۔ کمپنیوں کے لیے کم از کم سرمایہ 1 ملین کویتی دینار رکھا گیا ہے جبکہ کم از کم سرمایہ کاری کی حد 5 ملین کویتی دینار یعنی تقریباً 1.63 کروڑ امریکی ڈالر مقرر کی گئی ہے۔ اس کے علاوہ کویت میں فعال کاروباری سرگرمی کا ثبوت بھی ضروری ہوگا۔

درخواستیں کویت کی ڈائریکٹ انویسٹمنٹ پروموشن اتھارٹی (KDIPA) کے ذریعے جمع کروائی جائیں گی، تاہم حتمی منظوری وزارت داخلہ دے گی۔ ہر درخواست کی مکمل جانچ پڑتال کی جائے گی تاکہ صرف حقیقی اور سنجیدہ سرمایہ کاروں کو ہی اجازت دی جائے۔

پالیسی میں یہ بھی واضح کیا گیا ہے کہ اقامتی اجازت مستقل نہیں ہوگی بلکہ اس کی باقاعدہ تجدید ضروری ہوگی۔ درخواست گزار کے لیے صاف کریمنل ریکارڈ اور درست سفری دستاویزات بھی لازمی شرط ہیں۔ کسی بھی قسم کی غلط معلومات یا جعل سازی کی صورت میں درخواست مسترد کر دی جائے گی اور قانونی کارروائی بھی عمل میں لائی جا سکتی ہے۔