سعودی عرب میں نوکری کرنے والے پاکستانیوں کیلئے بڑی خبر آگئی

سعودی عرب کی وزارت انسانی وسائل و سماجی ترقی نے نجی شعبے میں کام کرنے والے مزدوروں کے لیے ایک اہم حفاظتی اقدام کا اعلان کیا ہے۔ اس کے تحت شدید گرمی کے موسم میں دوپہر کے اوقات میں کھلے ماحول میں کام کرنے پر پابندی برقرار رکھی جائے گی۔

وزارت کے مطابق یہ پابندی 15 جون سے 15 ستمبر تک نافذ رہے گی۔ اس دوران دن 12 بجے سے 3 بجے تک بیرونی مقامات پر کام کرنے کی اجازت نہیں ہوگی۔ اس فیصلے کا مقصد کارکنوں کو شدید گرمی اور دھوپ سے پیدا ہونے والے صحت کے خطرات سے بچانا ہے۔

یہ ضابطہ قومی کونسل برائے پیشہ ورانہ حفاظت اور صحت کے تعاون سے نافذ کیا گیا ہے۔ گرمی کے موسم میں مزدوروں کو ہیٹ اسٹروک اور دیگر طبی مسائل کا سامنا کرنا پڑ سکتا ہے، اس لیے ان اوقات میں کام روکنا ضروری ہے۔

وزارت نے تمام نجی اداروں کو ہدایت کی ہے کہ وہ اپنے کام کے اوقات نئے قواعد کے مطابق ترتیب دیں۔ ساتھ ہی کام کی جگہوں پر حفاظتی اقدامات کو یقینی بنایا جائے۔

ان اقدامات میں پینے کے پانی کی دستیابی، سایہ دار آرام گاہیں، مناسب ریسٹ ایریاز اور ذاتی حفاظتی سامان کی فراہمی شامل ہے۔ اداروں کو یہ بھی کہا گیا ہے کہ وہ اپنے کارکنوں کو گرمی کے اثرات اور احتیاطی تدابیر کے بارے میں آگاہ کریں۔