اپنی چھت، اپنا گھر پروگرام میں توسیع؛ مریم نواز نے نئی ہاؤسنگ اسکیم متعارف کروا دی

وزیراعلیٰ پنجاب مریم نواز شریف نے صوبے کے عوام، خصوصاً کم آمدن والے خاندانوں کے لیے "اپنی چھت، اپنا گھر” پروگرام کے تحت نئی سہولیات متعارف کروانے کا اعلان کیا ہے۔

 نئی اسکیم کا مقصد ایسے افراد کی مدد کرنا ہے جن کے گھروں کی حالت خراب ہے یا جو اپنے موجودہ گھر پر اضافی منزل تعمیر کرنا چاہتے ہیں۔ اس اقدام سے ہزاروں خاندان محفوظ اور بہتر رہائش حاصل کر سکیں گے۔

وزیراعلیٰ مریم نواز نے کہا کہ نئی اسکیم کے تحت شہری 10 لاکھ روپے تک بلاسود قرض حاصل کر سکتے ہیں۔ اس قرض کی واپسی 7، 8 یا 9 سال کی آسان ماہانہ اقساط میں کی جا سکے گی۔ اس اسکیم کو اس انداز میں تیار کیا گیا ہے تاکہ زیادہ سے زیادہ مستحق افراد اس سے فائدہ اٹھا سکیں اور مالی دباؤ کے بغیر اپنے گھروں کی تعمیر یا توسیع مکمل کر سکیں۔

انہوں نے کہا کہ ایسے تمام افراد جن کے گھروں کی چھتیں یا دیواریں کمزور ہو چکی ہیں، وہ اس پروگرام کے لیے درخواست دے سکتے ہیں۔ حکومت کی کوشش ہے کہ خستہ حال گھروں میں رہنے والے خاندانوں کو محفوظ رہائش فراہم کی جائے اور کسی بھی ممکنہ حادثے سے بچایا جا سکے۔

اس سے قبل وزیراعلیٰ پنجاب نے کاہنہ میں پیش آنے والے افسوسناک حادثے کے بعد "اپنا گھر، محفوظ گھر” پروگرام شروع کرنے کا فیصلہ کیا تھا۔ اسی سلسلے میں "اپنی چھت، اپنا گھر” پروگرام کا دائرہ کار بھی بڑھا دیا گیا ہے۔ حکومت نے دو نئی کیٹیگریز متعارف کروانے کی منظوری دی ہے تاکہ زیادہ سے زیادہ ضرورت مند خاندان اس سہولت سے مستفید ہو سکیں۔

کمزور اور خستہ حال گھروں کی چھتوں اور دیواروں کی مرمت اور مضبوطی کے لیے مستحق خاندانوں کو 5 لاکھ روپے تک کی مالی معاونت دی جائے گی۔ اس کے علاوہ وہ شہری جو اپنے گھر پر ایک اضافی منزل تعمیر کرنا چاہتے ہیں، انہیں 10 لاکھ روپے تک کا بلاسود قرض فراہم کیا جائے گا۔ اس قرض کی ادائیگی آسان اقساط میں ہوگی تاکہ درخواست گزاروں پر مالی بوجھ نہ پڑے۔

"اپنی چھت، اپنا گھر” پروگرام کے تحت اب تک ایک لاکھ 80 ہزار سے زائد خاندانوں کے لیے بلاسود قرضوں کی منظوری دی جا چکی ہے۔ ان میں سے ایک لاکھ 70 ہزار سے زیادہ خاندانوں کو قرض کی رقم بھی جاری کی جا چکی ہے۔ اس منصوبے کے لیے مجموعی طور پر 217 ارب 80 کروڑ روپے مختص کیے گئے ہیں تاکہ زیادہ سے زیادہ افراد کو فائدہ پہنچایا جا سکے۔

پروگرام کے تحت پنجاب بھر میں ایک لاکھ 34 ہزار سے زائد مکانات مکمل ہو چکے ہیں، جبکہ 27 ہزار 500 سے زیادہ گھر مختلف مراحل میں زیر تعمیر ہیں۔ اس اسکیم میں عوام کی دلچسپی کا اندازہ اس بات سے لگایا جا سکتا ہے کہ اب تک 12 لاکھ 78 ہزار سے زائد خاندان درخواستیں جمع کروا چکے ہیں۔