پاکستان نے ایل این جی کی خریداری کیلئے نیا ٹینڈر جاری کر دیا

مشرقِ وسطیٰ میں بڑھتی ہوئی کشیدگی اور آبنائے ہرمز کی ممکنہ بندش کے خدشات کے باعث پاکستان نے ایل این جی کی فراہمی یقینی بنانے کے لیے ایک اور اہم قدم اٹھا لیا ہے۔

 پاکستان ایل این جی لمیٹڈ (پی ایل ایل) نے ہنگامی بنیادوں پر سپاٹ ایل این جی کارگو خریدنے کے لیے نیا عالمی ٹینڈر جاری کر دیا ہے تاکہ ملک میں گیس کی سپلائی متاثر نہ ہو اور توانائی کی ضروریات بروقت پوری کی جا سکیں۔

پی ایل ایل کی جانب سے جاری کردہ اعلامیے کے مطابق دنیا بھر کی ایل این جی سپلائر کمپنیوں سے 15 جولائی تک بولیاں طلب کی گئی ہیں۔ یہ ٹینڈر 21 اور 22 جولائی کو پاکستان پہنچنے والے ایل این جی کارگو کی فراہمی کے لیے جاری کیا گیا ہے۔ تمام موصول ہونے والی بولیاں اسی روز کھولی جائیں گی تاکہ خریداری کے عمل میں تاخیر نہ ہو اور فوری فیصلہ کیا جا سکے۔

سرکاری ذرائع کے مطابق حکومت موجودہ عالمی صورتحال کو مدنظر رکھتے ہوئے ایل این جی کی دستیابی پر خصوصی توجہ دے رہی ہے۔ اگر خطے میں کشیدگی مزید بڑھتی ہے یا آبنائے ہرمز میں جہاز رانی متاثر ہوتی ہے تو توانائی کی عالمی سپلائی چین پر منفی اثرات مرتب ہو سکتے ہیں۔ اسی خطرے کے پیش نظر پاکستان پہلے سے ضروری ایندھن خریدنے کی حکمت عملی پر عمل کر رہا ہے۔

حکام نے بتایا کہ یہ پہلا موقع نہیں جب پاکستان نے ہنگامی بنیادوں پر سپاٹ ایل این جی کارگو خریدنے کا فیصلہ کیا ہو۔ اس سے قبل بھی جولائی کی ضروریات پوری کرنے کے لیے دو سپاٹ کارگو حاصل کیے جا چکے ہیں۔ ان میں 10 سے 11 جولائی کی سپلائی کے لیے ایل این جی 17.37 ڈالر فی ایم ایم بی ٹی یو کے نرخ پر خریدی گئی تھی، جبکہ 30 جون سے 4 جولائی کے دوران سپلائی ہونے والا کارگو 16.73 ڈالر فی ایم ایم بی ٹی یو کی قیمت پر حاصل کیا گیا تھا۔