ایس ای سی پی کا بڑا اقدام، سرمایہ کاروں کیلئے ڈیجیٹل کے وائی سی سسٹم متعارف

سیکیورٹیز اینڈ ایکسچینج کمیشن آف پاکستان (ایس ای سی پی) نے سرمایہ کاروں اور مالیاتی خدمات استعمال کرنے والے صارفین کے لیے ایک نئی اور جدید سہولت متعارف کروا دی ہے۔

 ادارے نے آئی بین (IBAN) کے ذریعے ڈیجیٹل کے وائی سی (Know Your Customer) سسٹم کا آغاز کیا ہے، جس کا مقصد سرمایہ کاری کے عمل کو آسان، تیز اور محفوظ بنانا ہے۔ اس نئے نظام سے صارفین کو مختلف مالیاتی اداروں میں اکاؤنٹ کھلوانے کے لیے روایتی تصدیقی مراحل سے گزرنے کی ضرورت کم ہو جائے گی۔

ایس ای سی پی کے مطابق اس اقدام سے کیپٹل مارکیٹ تک عوام کی رسائی مزید بہتر ہوگی۔ اب سرمایہ کار اپنی شناخت اور بینک اکاؤنٹ کی تصدیق آئی بین کے ذریعے کروا سکیں گے۔ اس سہولت کے بعد سیکیورٹیز بروکرز، انشورنس کمپنیاں، نان بینکنگ فنانس کمپنیاں (NBFCs) اور مضاربہ کمپنیاں صارفین کی شناخت ڈیجیٹل طریقے سے مکمل کر سکیں گی۔

نئے نظام کے تحت اسٹاک مارکیٹ میں نیا اکاؤنٹ کھلوانے کے لیے متعدد دستاویزات بار بار جمع کروانے یا بروکر کے دفتر جانے کی ضرورت نہیں رہے گی۔ شناختی عمل زیادہ آسان اور تیز ہوگا، جس سے وقت کی بچت بھی ہوگی اور سرمایہ کاروں کو بہتر سہولت ملے گی۔ خاص طور پر آن لائن سرمایہ کاری کرنے والے افراد اس تبدیلی سے زیادہ فائدہ اٹھا سکیں گے۔

ایس ای سی پی نے اس مقصد کے لیے اینٹی منی لانڈرنگ ریگولیشنز 2020 میں بھی ضروری ترامیم کر دی ہیں۔ ان تبدیلیوں کا مقصد مالیاتی نظام کو مزید محفوظ بنانا، غیر قانونی لین دین کی روک تھام کرنا اور صارفین کی درست شناخت کو یقینی بنانا ہے۔

ادارے کا کہنا ہے کہ نئے ڈیجیٹل کے وائی سی سسٹم میں تمام مالیاتی لین دین صرف صارف کے اپنے تصدیق شدہ بینک اکاؤنٹ کے ذریعے انجام پائے گا۔ اس سے ہر ٹرانزیکشن کا مکمل ریکارڈ محفوظ رہے گا اور مالیاتی سرگرمیوں میں شفافیت اور ٹریس ایبلٹی مزید بہتر ہوگی۔

اس کے علاوہ جدید بائیو میٹرک تصدیق، بشمول چہرے کی شناخت (Face Recognition)، کو بھی نئے ضوابط کا حصہ بنایا گیا ہے۔ اس ٹیکنالوجی کے ذریعے صارفین کی شناخت مزید محفوظ اور قابل اعتماد بنائی جائے گی، جبکہ جعل سازی اور دھوکا دہی کے امکانات بھی کم ہوں گے۔