پی ٹی اے کا موبائل صارفین کیلئے اہم الرٹ، شناختی کارڈ فعال رکھنے اور ڈیپ فیک مواد سے محتاط رہنے کی ہدایت

پاکستان ٹیلی کمیونیکیشن اتھارٹی (پی ٹی اے) نے ملک بھر کے موبائل صارفین کے لیے اہم ہدایات جاری کرتے ہوئے شناختی کارڈ فعال رکھنے اور انٹرنیٹ پر تصاویر و ویڈیوز کی تصدیق کے حوالے سے خبردار کر دیا ہے۔

پی ٹی اے نے صارفین کو موبائل سروس کی بلا تعطل فراہمی یقینی بنانے کے لیے اپنا کمپیوٹرائزڈ قومی شناختی کارڈ (CNIC) فعال رکھنے کی ہدایت کی ہے۔

اتھارٹی کے مطابق اگر کسی صارف کا شناختی کارڈ منسوخ ہو جائے، اس کی مدت ختم ہو جائے یا سم کسی ایسے شخص کے نام پر رجسٹرڈ ہو جس کا انتقال ہو چکا ہو تو متعلقہ موبائل سروسز بند کی جا سکتی ہیں۔

آن لائن دیکھی ہر تصویر یا ویڈیو پر فوراً یقین نہ کریں — یہ ڈیپ فیک بھی ہو سکتی ہے۔

جعلی مواد شہرت اور اعتماد کو نقصان پہنچانے کے ساتھ ساتھ رشتوں میں غلط فہمیاں بڑھانے کا باعث بھی بن سکتا ہے۔

کسی بھی غیر معمولی ویڈیو یا خبر کو شیئر کرنے سے پہلے اس کی تصدیق ضرور کریں۔

پہلے… pic.twitter.com/VLIA2svN8j

— PTA (@PTAofficialpk) July 22, 2026

پی ٹی اے نے واضح کیا کہ تین صورتوں میں سم سروس معطل ہونے کا امکان ہے، جن میں نادرا کی جانب سے شناختی کارڈ کی منسوخی، شناختی کارڈ کی میعاد ختم ہونا اور فوت شدہ فرد کے نام پر رجسٹرڈ سم شامل ہیں۔

پی ٹی اے نے صارفین کو مشورہ دیا ہے کہ جن افراد کے شناختی کارڈ کی مدت ختم ہو چکی ہے وہ فوری طور پر نادرا سے کارڈ کی تجدید کرائیں تاکہ موبائل سروس میں کسی قسم کی رکاوٹ سے بچا جا سکے۔

دوسری جانب پی ٹی اے نے سوشل میڈیا صارفین کو مصنوعی ذہانت (AI) سے تیار کردہ جعلی تصاویر اور ڈیپ فیک ویڈیوز سے محتاط رہنے کی ہدایت بھی جاری کی ہے۔

اتھارٹی نے کہا ہے کہ انٹرنیٹ پر موجود ہر تصویر، ویڈیو یا خبر حقیقت پر مبنی نہیں ہوتی، کیونکہ جدید ٹیکنالوجی کے ذریعے ایسا مواد تیار کیا جا سکتا ہے جو بظاہر حقیقی نظر آتا ہے۔

پی ٹی اے کے مطابق جعلی یا تبدیل شدہ مواد افراد کی ساکھ، عوامی اعتماد اور سماجی تعلقات کو نقصان پہنچا سکتا ہے، اس لیے کسی بھی غیر معمولی مواد کو شیئر کرنے سے پہلے مستند ذرائع سے تصدیق ضروری ہے۔

پی ٹی اے نے عوام پر زور دیا کہ ڈیجیٹل دور میں ذمہ دارانہ رویہ اپناتے ہوئے "پہلے سوچیں، پھر شیئر کریں” کے اصول پر عمل کریں تاکہ غلط معلومات کے پھیلاؤ کو روکا جا سکے۔