آزاد کشمیر اور گلگت بلتستان میں 5G سروس کا آزمائشی آغاز، 7 مقامات پر سہولت فعال

اسپیشل کمیونیکیشن آرگنائزیشن (ایس سی او) نے آزاد کشمیر اور گلگت بلتستان میں 5G سروس کا آزمائشی آغاز کردیا، جس کے تحت دونوں علاقوں کے 7 مقامات پر جدید موبائل ٹیکنالوجی فعال کردی گئی ہے۔

ایس سی او کے ڈائریکٹر جنرل نے 5G سروس کا افتتاح کیا، جس کے بعد گلگت بلتستان اور آزاد جموں و کشمیر کے ہیڈکوارٹرز میں فائیو جی سروس کے عملی مظاہرے بھی کیے گئے۔

ایس سی او کے مطابق 5G سروس کا آزمائشی آغاز آزاد کشمیر اور گلگت بلتستان میں ڈیجیٹل رابطوں اور ٹیکنالوجی کے فروغ کی جانب اہم قدم ہے، جس سے صارفین کو جدید موبائل ٹیکنالوجی تک بہتر رسائی حاصل ہوگی۔

منصوبے کے تحت دسمبر 2026 تک مزید 20 سائٹس پر 5G سروس فعال کرنے کا ہدف مقرر کیا گیا ہے، جس کے بعد دونوں علاقوں میں فعال 5G سائٹس کی مجموعی تعداد 27 ہوجائے گی۔

فائیو جی ٹیکنالوجی کے فروغ سے سیاحت، تعلیم، صحت، کاروبار اور عوامی خدمات کے شعبوں میں تیز رفتار ڈیجیٹل سہولیات اور نئے مواقع پیدا ہونے کی توقع ہے۔

ایس سی او کے مطابق آزمائشی مرحلے کے دوران صارفین کے تجربے اور ضروریات کا جائزہ لیا جائے گا، جس کی بنیاد پر مستقبل میں 5G نیٹ ورک کو مزید وسعت دینے اور جدید ڈیجیٹل سہولیات کی فراہمی میں مدد ملے گی۔