ویوو کا نیا فون سب سے آگے نکل گیا؛ قیمت اور فیچرز جان لیں

اگر آپ اپنے فون کو بار بار چارج کرنے سے پریشان ہیں تو ویوو کا نیا اسمارٹ فون آپ کی توجہ حاصل کرسکتا ہے۔

 کمپنی Vivo S2 FE کو 6 اکتوبر کو متعارف کروانے جا رہی ہے۔ فون کو Vivo V80 کے ساتھ پیش کیا جائے گا۔ ویوو نے لانچ کی تاریخ کی تصدیق کردی ہے، تاہم فون کی تمام خصوصیات اور حتمی قیمت ابھی سامنے نہیں آئی۔

Vivo S2 FE کی سب سے خاص بات اس کی مبینہ 10,000mAh بیٹری ہے۔ یہ تفصیل حالیہ لیکس میں سامنے آئی ہے۔ اگر یہ معلومات درست ثابت ہوتی ہیں تو یہ ویوو کی S سیریز میں بڑی بیٹری والے فونز میں شامل ہوگا۔ فون میں 44W فاسٹ چارجنگ دیے جانے کی بھی اطلاعات ہیں۔ تاہم صرف بڑی بیٹری کا مطلب یہ نہیں کہ فون لازماً دوگنا وقت چلے گا۔ اصل بیٹری ٹائمنگ کا اندازہ فون کے استعمال اور ٹیسٹنگ کے بعد ہی ہوگا۔

رپورٹس کے مطابق فون میں 6.83 انچ کی 1.5K AMOLED اسکرین دی جاسکتی ہے۔ اس کا ریفریش ریٹ 120Hz ہونے کی توقع ہے۔ اس طرح کی اسکرین ویڈیوز دیکھنے، سوشل میڈیا استعمال کرنے اور گیمنگ کے دوران اسکرولنگ کو زیادہ ہموار بنا سکتی ہے۔ یہ تمام تفصیلات فی الحال لیکس پر مبنی ہیں۔

کارکردگی کے لیے فون میں MediaTek Dimensity 7300e چپ سیٹ دیے جانے کی اطلاعات ہیں۔ یہ وہی چپ سیٹ ہے جو حالیہ لیکس میں Vivo S2 FE کے ساتھ مسلسل رپورٹ کیا گیا ہے۔ فون میں ان ڈسپلے فنگر پرنٹ سینسر بھی شامل ہونے کی توقع ہے۔

کیمرے کے حوالے سے بھی فون میں مناسب سیٹ اپ ملنے کی توقع ہے۔ لیکس کے مطابق پچھلے حصے میں 50 میگا پکسل کا مرکزی کیمرہ اور 2 میگا پکسل کا اضافی سینسر ہوسکتا ہے۔ سیلفی اور ویڈیو کالز کے لیے 32 میگا پکسل کا فرنٹ کیمرہ دیے جانے کی اطلاعات ہیں۔ تاہم ویوو نے ابھی مکمل کیمرہ تفصیلات باضابطہ طور پر جاری نہیں کیں۔

ویوو ایس 2 ایف ای کی متوقع قیمت 149,999 روپے بتائی گئی ہے۔ یہ قیمت لیک شدہ معلومات پر مبنی ہے اور ویوو نے اس کی تصدیق نہیں کی جبکہ  پاکستان میں فون کی دستیابی اور حتمی قیمت لانچ کے بعد ہی سامنے آئے گی۔