واٹس ایپ اکاؤنٹ ہیکنگ سے کیسے بچیں؟ پی ٹی اے کی صارفین کیلئے اہم ہدایات جاری

واٹس ایپ آج کے دور میں رابطے کا ایک اہم ذریعہ بن چکا ہے۔ کروڑوں افراد روزانہ اس ایپ کے ذریعے پیغامات، تصاویر، ویڈیوز اور دیگر معلومات شیئر کرتے ہیں۔

اسی وجہ سے سائبر جرائم میں ملوث افراد کی نظر بھی واٹس ایپ اکاؤنٹس پر رہتی ہے۔ ہیکرز مختلف طریقوں سے صارفین کے اکاؤنٹس تک رسائی حاصل کرنے کی کوشش کرتے ہیں۔ ایسے میں معمولی سی احتیاط بڑے نقصان سے بچا سکتی ہے۔

پاکستان ٹیلی کمیونیکیشن اتھارٹی (پی ٹی اے) نے بھی صارفین کو سائبر فراڈ اور واٹس ایپ اکاؤنٹ ہیکنگ سے محفوظ رہنے کے لیے احتیاطی تدابیر اختیار کرنے کا مشورہ دیا ہے۔ پی ٹی اے کی آگاہی مہم میں بتایا گیا ہے کہ صارفین اپنے اکاؤنٹس کی سیکیورٹی مضبوط بنانے کے لیے واٹس ایپ کے مختلف حفاظتی فیچرز کو لازمی فعال کریں۔

پی ٹی اے کے مطابق واٹس ایپ میں موجود سیکیورٹی نوٹیفکیشن فیچر صارفین کے لیے کافی مددگار ثابت ہوسکتا ہے۔ اس فیچر کو فعال کرنے کے لیے واٹس ایپ کی سیٹنگز میں جائیں۔ اس کے بعد اکاؤنٹس اور پھر سیکیورٹی نوٹیفکیشن کے آپشن کا انتخاب کریں۔ یہاں سے شو سیکیورٹی نوٹیفکیشن کو آن کیا جا سکتا ہے۔ اس کے بعد اکاؤنٹ کی سیکیورٹی سے متعلق کسی اہم تبدیلی کی صورت میں صارف کو اطلاع مل سکے گی۔

صارفین کو یہ بھی مشورہ دیا گیا ہے کہ وہ اپنے واٹس ایپ اکاؤنٹ کے ساتھ ایک محفوظ اور فعال ای میل ایڈریس ضرور منسلک رکھیں۔ اگر کسی وجہ سے اکاؤنٹ تک رسائی میں مسئلہ پیش آئے تو ریکوری کے عمل میں یہ ای میل مددگار ثابت ہوسکتی ہے۔ اس لیے ایسی ای میل استعمال کی جائے جس تک صرف صارف کی اپنی رسائی ہو۔

اس کے علاوہ واٹس ایپ کا ٹو اسٹیپ ویری فکیشن فیچر بھی فعال کرنا انتہائی ضروری ہے۔ یہ اضافی سیکیورٹی فراہم کرتا ہے اور اکاؤنٹ کو غیر مجاز رسائی سے محفوظ رکھنے میں مدد دیتا ہے۔ صارفین کو چاہیے کہ وہ اپنا سیکیورٹی کوڈ، پاس ورڈ یا تصدیقی معلومات کسی بھی شخص کے ساتھ شیئر نہ کریں۔

سائبر سیکیورٹی ماہرین کے مطابق صارفین کو نامعلوم لنکس کھولنے اور غیر ضروری فائلیں ڈاؤن لوڈ کرنے سے بھی گریز کرنا چاہیے۔ اگر کوئی مشکوک پیغام موصول ہو تو اس پر فوری کارروائی کرنے کے بجائے پہلے اس کی حقیقت جانچ لینی چاہیے۔ اسی طرح کسی اجنبی شخص کو ذاتی معلومات یا اکاؤنٹ سے متعلق تفصیلات فراہم نہیں کرنی چاہئیں۔