مکہ مکرمہ میں خواتین قرآن مقابلے کی اختتامی تقریب، شہزادی فہدہ بنت فلاح آل حثلین نے فاتحین میں انعامات تقسیم کئے

مکہ مکرمہ: خادم حرمین شریفین شاہ سلمان بن عبدالعزیز آل سعود کی سرپرستی میں ان کی اہلیہ شہزادی فہدہ بنت فلاح آل حثلین نے 46ویں شاہ عبدالعزیز بین الاقوامی حفظ، تلاوت اور تفسیر قرآن کریم مقابلے کے خواتین کے شعبے کی فاتحین میں انعامات تقسیم کیے۔

خواتین کے شعبے کی اختتامی تقریب مکہ مکرمہ میں وزارتِ اسلامی امور، دعوت و ارشاد کے زیر اہتمام منعقد ہوئی، جس کا آغاز تلاوتِ کلام پاک سے کیا گیا۔ تقریب میں وزیر اسلامی امور، دعوت و ارشاد شیخ ڈاکٹر عبداللطیف آل الشیخ کا ریکارڈ شدہ خطاب بھی پیش کیا گیا۔

شیخ ڈاکٹر عبداللطیف آل الشیخ نے کہا کہ مقابلے کا 46واں ایڈیشن اس کی تاریخ میں ایک نئے باب کا آغاز ہے، کیونکہ اس مرتبہ پہلی بار خواتین کی بین الاقوامی سطح پر شرکت کے ساتھ خواتین مقابلہ کنندگان کے لیے الگ اختتامی تقریب کا بھی اہتمام کیا گیا ہے۔

انہوں نے کہا کہ یہ پیش رفت سعودی قیادت کی جانب سے مقابلے کے لیے فراہم کردہ مسلسل سرپرستی اور بھرپور تعاون کی عکاس ہے۔ انہوں نے تمام شرکاء کو مقابلے میں شرکت پر مبارکباد دیتے ہوئے کہا کہ قرآن کریم حفظ کرنے والوں کا حقیقی اعزاز اس امر میں ہے کہ وہ قرآن کی تعلیمات کو اپنے علم، کردار، اخلاق اور طرزِ عمل میں عملی طور پر اختیار کریں۔

شیخ عبداللطیف آل الشیخ نے زور دیا کہ قرآن کریم کے حافظ اپنے ممالک کے لیے خیر و بھلائی کے مثالی سفیر بنیں اور قرآن کی عظیم تعلیمات کو اپنے عمل اور کردار کے ذریعے دنیا تک پہنچائیں۔

تقریب میں قرآن کریم کے حفظ، تلاوت اور فہم کے فروغ، بالخصوص خواتین میں قرآنی تعلیمات کی حوصلہ افزائی کے لیے مملکت سعودی عرب کی کاوشوں کو بھی اجاگر کیا گیا۔