آبنائے ہرمز سے تیل کی منتقلی کا امریکی دعویٰ جھوٹا ہے، ایران

سیکیورٹی ذرائع نے آبنائے ہرمز کے جنوبی راستے سے تیل کی بڑی مقدار کی منتقلی کے امریکی دعوؤں کو مسترد کرتے ہوئے اسے عالمی مارکیٹ میں توانائی کی قیمتوں میں ہیرا پھیری کی ناکام کوشش قرار دے دیا۔

تہران میں ایک باخبر سیکیورٹی ذرائع نے امریکی حکام کی جانب سے آبنائے ہرمز کے جنوبی راستے سے تیل بردار جہازوں کی بحالی کے دعوؤں کو یکسر مسترد کر دیا ہے۔

پریس ٹی وی سے بات کرتے ہوئے سیکیورٹی ذرائع نے واضح کیا کہ امریکی دعوے زمین پر موجود حقائق کے برعکس ہیں اور یہ امریکہ کی جانب سے جاری نفسیاتی جنگ کا حصہ ہیں تاکہ عالمی مارکیٹ میں توانائی کی قیمتوں کو کنٹرول کیا جا سکے۔

یہ بھی پڑھیں : آبنائے ہرمز کھولنے کے لیے جنگ بندی بنیادی شرط ہے، محسن رضائی

سیکیورٹی ذرائع کے مطابق واشنگٹن یہ تاثر دینے کی کوشش کر رہا ہے کہ اس اہم بحری راستے کا جنوبی حصہ ٹھیک کام کر رہا ہے جبکہ شمالی راستے کو غیر فعال دکھایا جا رہا ہے۔

انہوں نے کہا کہ آبنائے ہرمز کو بند رکھنے کے لیے ایران کی کارروائیاں مکمل طور پر حقیقی ہیں اور جن جہازوں نے قوانین کی خلاف ورزی کی انہیں نشانہ بنایا گیا ہے، جبکہ دیگر تیل بردار جہازوں نے ایرانی خبرداریاں ملنے کے بعد اپنے راستے تبدیل کر لیے ہیں۔

ایرانی ذرائع نے امریکی مؤقف پر سوال اٹھاتے ہوئے کہا کہ اگر واقعی جنوبی راستہ کھلا اور فعال ہے تو پھر واشنگٹن تہران پر سمجھوتے کے لیے دباؤ کیوں ڈال رہا ہے اور اس نے ایران کی غیر قانونی بحری ناکہ بندش کیوں برقرار رکھی ہوئی ہے؟ انہوں نے مزید کہا کہ امریکہ میں پیٹرولیم مصنوعات کی بڑھتی ہوئی قیمتیں خود امریکی دعوؤں کے جھوٹا ہونے کا ثبوت ہیں۔