آبنائے ہرمز کھولنے کے لیے جنگ بندی بنیادی شرط ہے، محسن رضائی

محسن رضائی نے امریکی صدر کے بیٹے کے قتل کے الزامات کو مسترد کرتے ہوئے آبنائے ہرمز کے کھلنے کو جنگ بندی سے مشروط کر دیا۔

ایران کے سیکیورٹی چیف محسن رضائی نے امریکی صدر ڈونلڈ ٹرمپ کے بیٹے کی قتل کی منصوبہ بندی سے متعلق امریکی الزامات کو سختی سے مسترد کرتے ہوئے انہیں جھوٹا اور بے بنیاد قرار دیا ہے۔ انہوں نے واضح کیا کہ ایران پر لگائے جانے والے اس قسم کے تمام الزامات کا حقیقت سے کوئی تعلق نہیں ہے۔

محسن رضائی نے اعلان کیا کہ ایران آبنائے ہرمز کو دوبارہ کھولنے کے حوالے سے اپنی شرائط کی فہرست تیار کر رہا ہے۔ ان شرائط میں خطے میں فوری اور مکمل جنگ بندی کا مطالبہ سب سے اہم نقطہ ہے۔

یہ بھی پڑھیں : امریکی صدر آبنائے ہرمز کھلنے پر فتح کا اعلان کر کے اپنی توجہ معیشت پر مرکوز کرلیں گے، رپورٹ

انہوں نے صفائی کے ساتھ کہا کہ خطے میں جاری جنگ کے خاتمے کے بغیر آبنائے ہرمز کو کسی صورت نہیں کھولا جائے گا۔

ایرانی سیکیورٹی چیف نے یہ بتایا کہ ایران اور عمان نے آبنائے ہرمز میں ایک مشترکہ ٹرانزٹ کوریڈور بنانے پر اتفاق کر لیا ہے۔

انہوں نے امریکا کو خبردار کرتے ہوئے کہا کہ اگر ایران کی ناکہ بندی برقرار رکھی گئی تو ایران خطے میں امریکی معاشی مفادات کو براہ راست اور شدید نشانہ بنائے گا۔