امریکی صدر آبنائے ہرمز کھلنے پر فتح کا اعلان کر کے اپنی توجہ معیشت پر مرکوز کرلیں گے، رپورٹ

امریکی صدر ڈونلڈ ٹرمپ آبنائے ہرمز کے دوبارہ کھلنے پر ایران جنگ میں فتح کا اعلان کرکے دیگر معاشی امور پر توجہ مرکوز کر سکتے ہیں۔

امریکی صدر ڈونلڈ ٹرمپ ایران کے ساتھ جاری تنازع میں کامیابی کا اعلان کرنے کے بعد دیگر ترجیحات کی طرف توجہ موڑ سکتے ہیں، بشرطیکہ آبنائے ہرمز کو دوبارہ کھول دیا جائے۔

رپورٹ کے مطابق ڈونلڈ ٹرمپ نے اپنے سیاسی اتحادیوں کو اشارہ دیا ہے کہ اس اہم سمندری راستے کا کھلنا جنگ سے نکلنے کا بہترین موقع فراہم کر سکتا ہے۔ ان کے مشیر بھی زور دے رہے ہیں کہ نومبر میں ہونے والے مڈ ٹرم انتخابات سے قبل امریکی معیشت پر توجہ مرکوز کی جائے۔

یہ ممکنہ حکمت عملی چھ ماہ سے جاری امریکی و اسرائیلی اور ایرانی جنگ کے بعد سامنے آئی ہے، جو واشنگٹن کی خواہش کے مطابق فریقین کے لیے فیصلہ کن ثابت نہیں ہو سکی۔

یہ جنگ اب ایک طویل کشمکش میں بدل چکی ہے، جس میں امریکا نے بمباری کے بجائے معاشی حربوں کا سہارا لینا شروع کر دیا ہے۔

یہ بھی پڑھیں : ایران کو آبنائے ہرمز عالمی معیشت کے خلاف دباؤ کے لیے استعمال نہیں کرنے دیں گے، امریکی وزیر خزانہ

ٹرمپ کی اس سوچ کا بنیادی مرکز آبنائے ہرمز ہے، جو اس تنازع میں دباؤ کا سب سے بڑا ذریعہ بن چکی ہے۔ امریکی انتظامیہ کا دعویٰ ہے کہ اس راستے کو کھولنے کی پیش رفت جاری ہے، جبکہ ایران کا کہنا ہے کہ اس راستے کی سیکیورٹی کو امریکی فوجی و معاشی دباؤ سے الگ نہیں کیا جا سکتا۔

اس راستے کا دوبارہ کھلنا ٹرمپ کو یہ موقع فراہم کرے گا کہ وہ اس غیر حل شدہ مسئلے کو اپنے لیے سیاسی کامیابی کے طور پر پیش کر سکیں۔

امریکا کی جانب سے بمباری کے بعد معاشی جنگ پر توجہ دینے کی ایک بڑی وجہ اس کے ہتھیاروں کے ذخائر میں کمی بھی ہے۔

رپورٹ کے مطابق امریکی جنگی سامان کی کمی کے باعث فوجی منصوبہ بندی متاثر ہو رہی ہے اور ایران کے ساتھ جنگی ضروریات کی وجہ سے جنوبی کوریا کے ساتھ ستمبر میں ہونے والی مشترکہ فوجی مشقیں بھی منسوخ کر دی گئی ہیں۔

دوسری جانب ایران نے امریکی معاشی دباؤ کو واشنگٹن کی فتح ماننے سے صاف انکار کر دیا ہے۔ ایرانی پارلیمنٹ کے اسپیکر محمد باقر قالیباف نے عزم ظاہر کیا ہے کہ ایران دشمن کی معاشی جنگ کا کامیابی سے مقابلہ کرے گا۔

ایران نے یہ خبردار بھی کیا ہے کہ سمندر میں ایرانی تیل کے جہازوں کو ضبط کرنے کی کسی بھی امریکی کوشش کا سخت جواب دیا جائے گا، جس سے حالت مزید بگڑ سکتی ہے۔