پاکستان حرمین شریفین کے تقدس اور مملکت کے دفاع کیلئے سعودی عرب کے ساتھ شانہ بشانہ کھڑا ہے، وزیراعظم

وزیراعظم شہباز شریف نے مکہ مکرمہ پر ڈرون حملے کی کوشش کی سخت ترین الفاظ میں مذمت کرتے ہوئے کہا ہے کہ پاکستان ہر مشکل میں سعودی عرب کے ساتھ کھڑا ہے۔

وزیراعظم شہباز شریف نے مکہ مکرمہ کے مقدس مقام پر بزدلانہ اور گھناؤنے ڈرون حملے کی کوشش کی سخت ترین الفاظ میں مذمت کی ہے۔

انہوں نے کہا ہے کہ پاکستانی عوام اس اشتعال انگیز اقدام پر شدید رنجیدہ اور پریشان ہیں اور اس قابل مذمت اور ناقابل معافی فعل پر ہمارے دکھ اور رنج کی گہرائی کو بیان کرنے کے لیے الفاظ کافی نہیں۔

یہ بھی پڑھیں : مکہ مکرمہ میں ڈرون حملے کی مذمت، پاکستان سعودی عرب کے ساتھ شانہ بشانہ کھڑا ہے، وزیراعظم

وزیراعظم نے سعودی مسلح افواج کی غیر معمولی چوکسی، جرأت اور پیشہ ورانہ مہارت کو شاندار الفاظ میں خراج تحسین پیش کیا، جنہوں نے فوری اور بہادرانہ کارروائی کی۔

انہوں نے ایک بار پھر تمام فریقین پر زور دیا کہ وہ زیادہ سے زیادہ تحمل کا مظاہرہ کریں اور مزید کشیدگی سے گریز کریں کیونکہ ہمارا خطہ پہلے ہی تنازعات کی بہت بھاری قیمت چکا چکا ہے اور پائیدار امن کے لیے بات چیت اور سفارت کاری ہی واحد راستہ ہے۔

وزیراعظم نے اس عزم کا اعادہ کیا کہ پاکستان حرمین شریفین کے تقدس، سلامتی اور سعودی عرب کی خودمختاری کے دفاع کے لیے برادر ملک کے ساتھ شانہ بشانہ کھڑا ہے اور یہ ایک ایسی ذمہ داری ہے، جسے ہر پاکستانی اپنے دل کے بہت قریب رکھتا ہے۔