مکہ معاہدے میں کئی اسلامی ممالک شامل ہونا چاہتے ہیں، ایران کو کوئی تحفظات نہیں : خواجہ آصف

خواجہ آصف کا کہنا ہے کہ مکہ معاہدے میں کئی اسلامی ممالک شامل ہونا چاہتے ہیں، اس پر ایران کو کوئی تحفظات نہیں ہیں، افغان سرزمین پاکستان کے خلاف استعمال ہو رہی ہے۔

نیویارک میں میڈیا کے نمائندوں سے تفصیلی گفتگو کرتے ہوئے وفاقی وزیر دفاع خواجہ آصف نے کہا کہ خطے میں امن کے قیام کے حوالے سے ہونے والا مکہ معاہدہ اب ایک زمینی حقیقت کا روپ دھار چکا ہے اور اس کے خدوخال دن بدن واضح ہوتے جا رہے ہیں۔

انہوں نے اس عزم کا اظہار کیا کہ جو بھی اسلامی ملک اس معاہدے میں شرکت کرے گا، اس کا بنیادی مقصد خطے میں پائیدار امن کا قیام ہی ہوگا۔

ایران کے حوالے سے بات کرتے ہوئے انہوں نے واضح کیا کہ ایران ہمارے خطے کا ایک انتہائی اہم ملک ہے اور تہران کو اس مکہ معاہدے کے حوالے سے کسی قسم کے کوئی تحفظات حاصل نہیں ہیں۔

انہوں نے اس بات کا اعادہ کیا کہ پاکستان ہمیشہ کی طرح خطے میں امن اور استحکام کے فروغ کے لیے اپنا مثبت اور کلیدی کردار ادا کرتا رہے گا، کیونکہ باہمی ملاقاتوں اور رابطوں سے ہی تمام پیچیدہ معاملات بہتری کی سمت گامزن ہو سکتے ہیں۔

یہ بھی پڑھیں : ایران نے آبنائے ہرمز اور مذاکرات کی بحالی کیلئے امریکہ کو نئی تجویز دے دی

دوسری جانب ملکی اور سرحدی سلامتی کے امور پر بات کرتے ہوئے وزیر دفاع نے کڑے الفاظ میں کہا کہ بدقسمتی سے افغان سرزمین تاحال پاکستان کے خلاف دہشت گردی کے لیے کھلے عام استعمال ہو رہی ہے۔

انہوں نے دوٹوک انداز میں اس تاثر کو مسترد کیا کہ پاکستان افغانستان کے اندر کسی بھی مقام پر معصوم سویلین آبادی کو نشانہ بنا رہا ہے۔

خواجہ آصف نے خیبر پختونخوا کی صوبائی حکومت پر شدید تنقید کی اور کہا کہ کے پی حکومت کی طرف سے صوبے میں امن و امان قائم کرنے کے لیے سنجیدگی کا کوئی مظاہرہ نہیں کیا جا رہا، بلکہ اس کے برعکس صوبائی حکومت وفاقی دارالحکومت اسلام آباد پر حملے کی سازشوں اور منصوبہ بندیوں میں مصروف ہے۔

انہوں نے پی ٹی آئی قیادت کو تنقید کا نشانہ بناتے ہوئے کہا کہ تحریک انصاف کی حکومت کی اولین ترجیح اپنے ہی صوبے میں امن کا قیام ہونی چاہیے، لیکن افسوسناک امر یہ ہے کہ ان کے رہنما شہدا کے جنازوں تک میں شرکت کرنے کی زحمت گوارا نہیں کرتے۔