دنیا خلیجی سلامتی کو سنجیدگی سے لے، سعودی وزیر خارجہ کا اقوام متحدہ سے خطاب

سعودی وزیر خارجہ نے اقوام متحدہ کی جنرل اسمبلی سے خطاب کرتے ہوئے دنیا کو خلیجی سلامتی کو سنجیدگی سے لینے کی تنبیہ کی ہے۔

سعودی عرب کے وزیر خارجہ نے اقوام متحدہ کی جنرل اسمبلی سے خطاب کرتے ہوئے کہا کہ دنیا کو بے مثال چیلنجز کا سامنا ہے۔ انہوں نے مملکت پر ایرانی اور حوثی حملوں کی شدید مذمت کی اور دنیا کو تنبیہ کی کہ وہ خلیجی سلامتی کو سنجیدگی سے لے۔

شہزادہ فیصل نے کہا کہ خطے کے ممالک کے درمیان پائیدار تعلقات قائم کرنے کی کوئی بھی کوشش غلبے، اثر و رسوخ یا بحرانوں سے فائدے اٹھانے پر مبنی نہیں ہو سکتی، بلکہ ان کی بنیاد باہمی احترام، مشترکہ مفادات، حسن جوار اور ریاستوں کی خودمختاری کے احترام پر ہونی چاہیے۔

یہ بھی پڑھیں : فرانس کا سعودی عرب کی تیل تنصیبات کی حفاظت کے لیے فوج بھیجنے کا اعلان

انہوں نے دنیا کی اہم آبی گزرگاہوں، بشمول آبنائے ہرمز، باب المندب، بحیرہ احمر اور خلیج عدن میں جہاز رانی کی آزادی کو برقرار رکھنے کا مطالبہ کیا اور آبنائے ہرمز سے گزرنے والے شہری جہازوں پر فیس یا ٹرانزٹ شرائط عائد کرنے کی ایرانی کوشش کو مسترد کر دیا۔

فلسطینی مسئلے پر بات کرتے ہوئے انہوں نے کہا کہ غزہ اور مغربی کنارے میں فلسطینی عوام کے مسلسل مصائب اور اسرائیلی قابضین کی طرف سے شہریوں کو نشانہ بنانا عالمی قوانین کی سنگین خلاف ورزی ہے اور دو ریاستی حل ہی اس تنازع کو ختم کرنے کا واحد طریقہ ہے۔