پنجاب کے طلبا کیلئے الیکٹرک بائیکس کی تقسیم کا شیڈول جاری

پنجاب حکومت کی جانب سے طلبا میں الیکٹرک بائیکس کی تقسیم کے حوالے سے اہم پیش رفت سامنے آئی ہے۔

 تفصیلات کے مطابق منتخب طلبا کو الیکٹرک بائیکس نومبر 2026 کے آغاز سے فراہم کرنے کا منصوبہ ہے۔ اس اسکیم کا مقصد طلبا کو تعلیمی اداروں تک آنے جانے کے لیے آسان اور کم خرچ سفری سہولت فراہم کرنا ہے۔

حکومت پنجاب کی جانب سے طلبا کے لیے بائیک اسکیم کو پہلے ہی ٹرانسپورٹ کے منصوبوں میں شامل کیا گیا ہے۔ سرکاری ٹرانسپورٹ ڈیپارٹمنٹ کے مطابق اسکیم کا مقصد طلبا کے سفری مسائل کم کرنا اور انہیں تعلیم کے لیے قابل اعتماد اور ماحول دوست ٹرانسپورٹ فراہم کرنا ہے۔

فراہم کردہ اعداد و شمار کے مطابق الیکٹرک بائیک اسکیم کے لیے اب تک 11 لاکھ 49 ہزار 58 طلبا درخواست دے چکے ہیں۔ درخواست دینے والوں میں 2 لاکھ 22 ہزار 101 طالبات بھی شامل ہیں۔ موجودہ مرحلے میں مجموعی طور پر ایک لاکھ الیکٹرک بائیکس تقسیم کرنے کا منصوبہ ہے۔

اس اسکیم کے لیے درخواستوں کا عمل 5 ستمبر 2026 کو شروع کیا گیا تھا۔ درخواست جمع کروانے کی آخری تاریخ 4 اکتوبر 2026 مقرر کی گئی ہے۔ اس کے بعد درخواستوں کی جانچ اور اہلیت کے مطابق انتخاب کا عمل مکمل کیا جائے گا۔

الیکٹرک بائیک کی قیمت کے حوالے سے بتایا گیا ہے کہ اس کی مارکیٹ قیمت ایک لاکھ 99 ہزار روپے ہے۔ تاہم حکومتی سبسڈی کے بعد اہل طلبا کو یہ بائیک ایک لاکھ 9 ہزار روپے میں فراہم کی جائے گی۔

فراہم کردہ تفصیلات کے مطابق بائیک کی باقی رقم 36 ماہ کی آسان اقساط میں ادا کرنا ہوگی۔ ماہانہ قسط 3 ہزار 28 روپے مقرر کی گئی ہے۔ طلبا کو ڈاؤن پیمنٹ دینے کی ضرورت نہیں ہوگی۔

اسکیم میں طلبا کی حفاظت کو بھی مدنظر رکھا گیا ہے۔ منتخب طلبا کو الیکٹرک بائیک کے ساتھ مفت ہیلمٹ اور سیفٹی راڈز فراہم کیے جائیں گے۔ انہیں ڈرائیونگ کی تربیت بھی دی جائے گی تاکہ وہ سڑکوں پر محفوظ طریقے سے بائیک چلا سکیں۔

حکومت پنجاب الیکٹرک بائیکس کے استعمال کے لیے تعلیمی اداروں میں چارجنگ کی سہولت بھی بڑھا رہی ہے۔ پنجاب ہائر ایجوکیشن ڈیپارٹمنٹ کے مطابق سرکاری کالجز میں سولر سسٹمز کے ساتھ الیکٹرک وہیکل چارجنگ اسٹیشنز بھی قائم کیے جا رہے ہیں۔ منصوبے میں 355 کالجز شامل ہیں۔