یمن میں شدید جھڑپیں، حوثی ملیشیا کے 100 جنگجوؤں کے مارے جانے کی اطلاعات

یمن کی سرکاری فوج نے صوبہ تعز میں عسکری کارروائیوں کے دوران 100 حوثی جنگجوؤں کی ہلاکت اور 5 ڈرون گرانے کا دعویٰ کیا ہے۔

یمن کی سرکاری فوج کے تعز ملٹری ایکسس کے سرکاری حکام نے بتایا ہے کہ سرکاری فورسز نے ڈان آف یمن نامی بڑے عسکری آپریشن کے تحت مختلف محاذوں پر سخت حملے کیے ہیں۔

یہ بھی پڑھیں : سعودی اتحاد کی یمن میں کارروائی، حوثی ملیشیاء کے بیلسٹک میزائلوں کا ذخیرہ تباہ کردیا

ان مربوط کارروائیوں کے نتیجے میں تقریباً 100 حوثی جنگجو ہلاک اور 150 کے قریب زخمی ہو چکے ہیں۔ جھڑپوں کے دوران حوثیوں کے زیرِ استعمال 6 عسکری گاڑیاں اور ایک ٹینک بھی مکمل طور پر تباہ یا ناکارہ بنا دیا گیا ہے۔

اس کے علاوہ یمنی فوج نے کامیاب پیش قدمی کرتے ہوئے جنوبی تعز میں واقع اہم علاقوں جبل المنظرہ، الاشاریف اور ذیبان کو حوثیوں کے قبضے سے مکمل طور پر آزاد کرا لیا ہے، جبکہ اس دوران دشمن کے 5 ڈرون بھی مار گرائے گئے ہیں۔