پیٹرول و ڈیزل کی قیمتوں میں کمی کیلئے عدالت میں بڑا قدم اٹھالیا گیا

لاہور ہائی کورٹ میں پیٹرولیم مصنوعات کی بڑھتی ہوئی قیمتوں کے خلاف آئینی درخواست دائر کروائی گئی، جس میں حکومت کی جانب سے قیمتوں میں مسلسل اضافے کو چیلنج کیا گیا۔

درخواست جوڈیشل ایکٹوازم پینل کی طرف سے دائر کی گئی۔ درخواست گزاروں کا کہنا ہے کہ پیٹرول اور ڈیزل کی قیمتوں میں بار بار اضافہ عوام کے لیے شدید مشکلات پیدا کر رہا ہے۔ اس سے مہنگائی میں تیزی آئی ہے اور عام شہری کی زندگی متاثر ہو رہی ہے۔

درخواست میں مؤقف اپنایا گیا ہے کہ پاکستان کے مقابلے میں خطے کے دیگر ممالک میں پیٹرولیم مصنوعات کی قیمتیں زیادہ مستحکم ہیں۔ جبکہ یہاں قیمتوں میں بار بار اضافہ کیا جا رہا ہے، جو عوامی مفاد کے خلاف ہے۔

درخواست گزار کے مطابق یہ اضافہ آئین کے مختلف آرٹیکلز کی خلاف ورزی ہے۔ ان میں آرٹیکل 9، 14، 18، 23 اور 24 شامل ہیں، جو شہریوں کے بنیادی حقوق سے متعلق ہیں۔ قیمتوں میں غیر ضروری اضافہ ان حقوق کو متاثر کر رہا ہے۔

درخواست میں عدالت سے استدعا کی گئی ہے کہ پیٹرولیم مصنوعات کی قیمتوں میں حالیہ اضافے کو غیر آئینی قرار دیا جائے۔ اس کے ساتھ یہ بھی کہا گیا ہے کہ قیمتوں کے تعین کے لیے ایک واضح، شفاف اور قانونی طریقہ کار بنایا جائے تاکہ مستقبل میں عوام کو ریلیف مل سکے۔