حکومت کا بلاسود قرض پروگرام کا اعلان

وفاقی حکومت نے بجٹ 2026-27 میں زرعی شعبے کے لیے بڑے مالی پیکیج کا اعلان کیا ہے۔ اس پیکیج کا مقصد چھوٹے کسانوں کو سہولت دینا، زرعی پیداوار میں اضافہ کرنا اور ملک کی معیشت میں زراعت کے کردار کو مزید مضبوط بنانا ہے۔

بجٹ دستاویزات کے مطابق چھوٹے کسانوں کے لیے 300 ارب روپے کے بلاسود قرضے دینے کا فیصلہ کیا گیا ہے۔ یہ قرضہ "زرعی سہولت پروگرام” کے تحت دیا جائے گا۔ تقریباً 7 لاکھ 50 ہزار چھوٹے کسان اس اسکیم سے فائدہ اٹھا سکیں گے۔

حکومت نے یہ بھی اعلان کیا ہے کہ 12 ایکڑ سے کم زمین رکھنے والے کسانوں کو فی ایکڑ 1500 روپے سبسڈی دی جائے گی۔ اس اقدام کا مقصد زرعی لاگت کو کم کرنا اور پیداوار میں اضافہ کرنا ہے۔ اس کے علاوہ زرعی مشینری کے لیے 5 ارب روپے کی سبسڈی بھی مختص کی گئی ہے تاکہ جدید آلات کسانوں تک پہنچ سکیں۔

کھاد کی قیمتوں کو مستحکم رکھنے کے لیے حکومت نے کھاد بنانے والی صنعتوں کو 20 ارب روپے کا خصوصی پیکیج دینے کا فیصلہ کیا ہے۔ اس سے نہ صرف کھاد کی قیمتوں میں استحکام آئے گا بلکہ زرعی پیداوار بھی متاثر نہیں ہوگی۔

ماحولیاتی تبدیلیوں کے اثرات سے نمٹنے کے لیے ورلڈ بینک کے تعاون سے 200 ملین ڈالر بھی مختص کیے گئے ہیں۔ اس فنڈ سے جدید زرعی ٹیکنالوجی، تحفظ کے اقدامات اور موسمی خطرات سے بچاؤ کے منصوبے شروع کیے جائیں گے۔

بلوچستان میں زرعی ٹیوب ویلز کے لیے 3 ارب روپے کی سبسڈی بھی بجٹ کا حصہ بنائی گئی ہے تاکہ پانی کی کمی کے مسئلے کو کم کیا جا سکے اور زراعت کو سہارا ملے۔

اسی طرح وزیراعظم یوتھ بزنس اینڈ ایگریکلچر پروگرام کے لیے 20 ارب روپے رکھے گئے ہیں تاکہ نوجوانوں کو زرعی کاروبار کی طرف راغب کیا جا سکے اور روزگار کے نئے مواقع پیدا ہوں۔