خیبر پختونخوا؛ نئے فنانس بل میں 20 ہزار سے 3 لاکھ روپے تک ماہانہ آمدنی پر سالانہ پروفیشنل ٹیکس مقرر

خیبر پختونخوا حکومت نے نئے مالی سال کے لیے فنانس بل 2026 میں اہم تبدیلیاں متعارف کروا دی ہیں۔ ان تبدیلیوں کے تحت پروفیشنل ٹیکس کی نئی شرحیں مقرر کی گئی ہیں۔ یہ قانون یکم جولائی 2026 سے نافذ العمل ہوگا۔

سرکاری دستاویزات کے مطابق صوبے میں 20 ہزار روپے سے لے کر 3 لاکھ روپے ماہانہ آمدنی رکھنے والے افراد پر سالانہ پروفیشنل ٹیکس لاگو ہوگا۔ اس کا مقصد صوبے کے مالی نظام کو بہتر بنانا بتایا جا رہا ہے۔

حکومت نے واضح کیا ہے کہ کم آمدنی والے افراد کو ریلیف دیا گیا ہے۔ کم از کم اجرت تک آمدنی رکھنے والے شہریوں کو مکمل طور پر پروفیشنل ٹیکس سے مستثنیٰ قرار دیا گیا ہے۔ اسی طرح گریڈ 1 سے گریڈ 6 تک کے سرکاری ملازمین بھی اس ٹیکس سے محفوظ رہیں گے۔

نئے سلیب کے مطابق 20 ہزار روپے ماہانہ آمدنی والے افراد کو سالانہ 1400 روپے ٹیکس دینا ہوگا۔ جبکہ 3 لاکھ روپے سے زیادہ ماہانہ آمدنی رکھنے والوں کے لیے 5500 روپے سالانہ ٹیکس مقرر کیا گیا ہے۔

اعلیٰ سرکاری افسران کے لیے بھی الگ شرح رکھی گئی ہے۔ گریڈ 20 اور اس سے اوپر کے ملازمین پر 4000 روپے سالانہ پروفیشنل ٹیکس لاگو ہوگا۔

فنانس بل میں مزید بتایا گیا کہ بقایا جات کی وصولی کے لیے بھی رعایت دی جا رہی ہے۔ 30 جون 2026 تک کے بقایا ٹیکس پر خصوصی ریلیف دیا جائے گا۔

رہائشی جائیدادوں کے بقایا جات پر بھی سہولت فراہم کی گئی ہے۔ اگر شہری 31 دسمبر 2026 تک تمام بقایا جات ایک ساتھ ادا کرتے ہیں تو انہیں 30 فیصد تک رعایت ملے گی۔

سیاحت اور ہوٹل انڈسٹری کے لیے بھی نئے قوانین شامل کیے گئے ہیں۔ پی او ایس سسٹم سے منسلک ہوٹلوں پر 5 فیصد ٹیکس لگے گا۔ جبکہ جو ہوٹل اس سسٹم سے منسلک نہیں ہوں گے ان پر 10 فیصد ٹیکس عائد ہوگا۔