خواتین موبائل ایپ کے ذریعے 1 لاکھ سے 15 لاکھ روپے تک کا قرض کس طرح حاصل کرسکتی ہیں؟ آسان طریقہ سامنے آگیا

سیکیورٹیز اینڈ ایکسچینج کمیشن آف پاکستان (ایس ای سی پی) نے خواتین کے لیے ایک نئی مالی سہولت کی منظوری دے دی ہے۔ اس پروڈکٹ کا نام ’’خودمختار خاتون‘‘ رکھا گیا ہے۔

اس نئی سہولت کے تحت خواتین اپنے کاروبار کے لیے ایک لاکھ روپے سے لے کر 15 لاکھ روپے تک کی اثاثہ فنانسنگ حاصل کر سکیں گی۔ یہ رقم خاص طور پر کاروبار شروع کرنے یا اسے بڑھانے کے لیے استعمال کی جا سکے گی۔

ایس ای سی پی کے مطابق یہ فنانسنگ خواتین کو کاروباری مشینری، ضروری سامان اور دیگر اثاثے خریدنے میں مدد دے گی۔ اس سے خواتین کو سرمایہ کی کمی کا مسئلہ کم ہوگا اور وہ آسانی سے اپنا کاروبار چلا سکیں گی۔

یہ فنانسنگ سہولت مکمل طور پر ڈیجیٹل اور شریعہ کمپلائنٹ ہے۔ اس میں کسی دفتر کے چکر یا طویل کاغذی کارروائی کی ضرورت نہیں ہوگی۔ خواتین گھر بیٹھے موبائل ایپ ’’حکیم‘‘ کے ذریعے آن لائن درخواست دے سکیں گی۔

حکام کے مطابق اس فنانسنگ کی واپسی ایک سال کے اندر ماہانہ اقساط کی صورت میں آسان طریقے سے کی جا سکے گی۔ اس سے خواتین پر مالی دباؤ کم رہے گا۔

ایس ای سی پی نے بتایا کہ ملک میں نان بینکنگ فنانس کمپنیاں پہلے ہی بڑے پیمانے پر مالی سہولتیں فراہم کر رہی ہیں۔ جولائی سے دسمبر 2025 کے دوران تقریباً 111 ارب روپے کی فنانسنگ فراہم کی گئی۔ اس سے لاکھوں چھوٹے کاروبار فائدہ اٹھا چکے ہیں۔

اب ’’خودمختار خاتون‘‘ پروگرام کے ذریعے خواتین انٹرپرینیورز کو بھی اس مالی نیٹ ورک کا حصہ بنایا جا رہا ہے۔