بنوں میں دہشت گردوں کے حملے میں شہید میجر عدنان کی نماز جنازہ چکلالہ میں ادا

بنوں میں دہشت گردوں کے حملے میں شہید میجر عدنان اسلم کی نماز جنازہ چکلالہ میں ادا کردی گئی۔

پاک فوج کے شعبہ تعلقات عامہ آئی ایس پی آر کے مطابق میجر عدنان اسلم شہید کی نمازجنازہ میں وزیراعظم شہباز شریف اور فیلڈ مارشل عاصم منیر نے بھی شرکت کی۔

شہید میجر عدنان گزشتہ روز دہشت گردوں سے لڑتے ہوئے شہید ہوگئے تھے۔ انھوں نے اپنے ساتھی کو بچاتے ہوئے ملک پر جان نچھاور کردی۔

میجر عدنان چھٹی پر تھے تاہم اس کے باوجود انہوں نے رضاکارانہ طور پر آپریشن میں حصہ لیا۔ 3 ستمبر کو دہشت گردوں کے حملے کے بعد یہ کلیئرنس آپریشن کیا جا رہا تھا۔ لڑائی کے دوران انھوں نے ایک ساتھی کے سامنے ڈھال بن کر گولیاں اپنے اوپر لے لیں تاکہ اس کی جان بچ سکے۔

ان کی اس قربانی کی بدولت مشن کامیاب رہا۔ مگر میجر عدنان کی شہادت نے پوری قوم کو غمگین کر دیا۔