کراچی رینجرز کیمپ حملے میں گرفتار افغان دہشت گرد کا اعترافی بیان جاری

کراچی میں رینجرز کیمپ پر بم حملے میں ملوث گرفتار افغان دہشت گرد نے بتایا کہ وہ افغانستان کے شہر جلال آباد سے آیا تھا۔

کراچی رینجرز کیمپ حملے میں گرفتار ہونے والے افغان دہشت گرد عثمان نے اپنے اعترافی بیان میں اہم انکشافات کیے ہیں۔

دہشت گرد عثمان علی نے بتایا کہ وہ افغانستان کے علاقے جلال آباد کا رہائشی ہے اور پاکستان رینجرز کے کیمپ پر بم جانان نامی دہشت گرد نے پھینکا تھا۔

یہ بھی پڑھیں : کراچی میں رینجرز کیمپ پر دہشت گردوں کا حملہ، 3 خارجی ہلاک، ایک گرفتار، 3 بہادر اہلکار بھی شہید

گرفتار دہشت گرد نے بتایا کہ وہ اور اس کے ساتھی 7 دن پہلے باجوڑ کے رہائشی عبدالہادی نامی شخص کے پاس آئے تھے، جہاں انہیں ایک زیر تعمیر بلڈنگ میں ٹھہرایا گیا تھا۔

عثمان نے اعتراف کیا کہ دہشت گردی کی اس کارروائی کے لیے اسلحہ عبدالہادی وزیرستان سے لے کر آیا تھا۔ ملزم نے انکشاف کیا کہ اس نیٹ ورک میں اس کے ساتھ 3 اور ساتھی بھی شامل تھے، جن کے نام عبدالہادی، جانان اور عمر فاروق ہیں۔

ملزم عثمان نے مزید کہا کہ اس کے ساتھ افغانستان سے آنے والا اس کا اہم ساتھی اور دہشت گرد عبدالہادی اب مارا جا چکا ہے۔ سیکیورٹی حکام اس اعترافی بیان کی روشنی میں مزید نیٹ ورکس کی تلاش کر رہے ہیں۔