چین، تائیوان صدر کے امریکی دورے کو کسی بہانے کے طور پر استعمال نہ کرے : وائٹ ہاؤس

وائٹ ہاؤس کا کہنا ہے کہ بیجنگ بات چیت کے راستے کھلے رکھے، تائیوان صدر کے دورے کو کسی بہانے کے طور پر استعمال نہیں کرے۔

وائٹ ہاؤس کے قومی سلامتی کے ترجمان جان کربی نے صحافیوں کو بتایا کہ تائیوان کی صدر سائی انگ وین کی جلد ہی امریکہ آمد معمول کی آمد و رفت کا سلسلہ ہے، جو ہمارے تائیوان کے ساتھ ہمارے دیرینہ غیر سرکاری تعلقات اور امریکہ کی ون چائنہ پالیسی سے مطابقت رکھتا ہے، جس میں کوئی تبدیلی نہیں ہوئی۔

انہوں نے کہا کہ عوامی جمہوریہ چین کو اس دورے کو آبنائے تائیوان کے ارد گرد کسی بھی سرگرمی کو تیز کرنے کے بہانے کے طور پر استعمال نہیں کرنا چاہیے۔ چین کے لیے یہاں زیادہ رد عمل ظاہر کرنے کی کوئی وجہ نہیں ہے۔

یہ بھی پڑھیں : چینی صدر کی محمد بن سلمان سے فون پر اہم بات چیت، سعودی ایران مذاکرات کی حمایت

ان کا کہنا تھا کہ ہم اس بات کو ذہن میں رکھتے ہیں کہ اس وقت امریکہ اور چین کے درمیان حالات کشیدہ ہیں، لیکن انہوں نے بیجنگ پر زور دیا کہ وہ بات چیت کے راستے کھلے رکھے۔

ترجمان نے یہ بھی کہا کہ واشنگٹن اب بھی سیکریٹری آف اسٹیٹ انٹونی بلنکن کے بیجنگ کے دورے کو دوبارہ شیڈول کرنا چاہتا ہے، جو اس وقت ملتوی کر دیا گیا تھا، جب ایک مشتبہ چینی جاسوس غبارہ امریکہ کے اوپر سے گزرا تھا اور اسے امریکی لڑاکا طیارے نے مار گرایا تھا۔

تائی پے میں بات کرتے ہوئے، تائیوان نیشنل سیکیورٹی بیورو کے ڈائریکٹر جنرل تسائی منگ ین نے کہا کہ اس طرح کی آمدورفت کئی سالوں سے ہوتی رہی ہے۔ تائیوان کو اس عمل کے دوران بین الاقوامی برادری کے ساتھ بات چیت کا حق حاصل ہے۔ مجھے امید ہے کہ چینی کمیونسٹ زیادہ رد عمل کا اظہار نہیں کریں گے۔