ڈکی بھائی کیلئے نئی پریشانی؛ عدالت سے اہم خبر آگئی

لاہور ہائیکورٹ میں معروف یوٹیوبر سعد الرحمان المعروف ڈکی بھائی کی درخواستِ ضمانت پر سماعت آج مقرر تھی، تاہم یہ سماعت اس وقت مؤخر کر دی گئی جب جسٹس فاروق حیدر نے کیس کی سماعت سے معذرت کر لی۔

عدالتی کارروائی کے دوران جسٹس فاروق حیدر نے کیس کی فائل چیف جسٹس لاہور ہائیکورٹ کو بھجوا دی تاکہ درخواستِ ضمانت کو کسی دوسرے بینچ کے سامنے مقرر کیا جا سکے۔ عدالت کے نوٹ میں واضح کیا گیا کہ چیف جسٹس مناسب بینچ کے روبرو سماعت کی نئی تاریخ مقرر کریں گے۔

ڈکی بھائی کے خلاف مقدمہ نیشنل سائبر کرائم انویسٹی گیشن ایجنسی کی جانب سے درج کیا گیا تھا۔ ایجنسی کے مطابق یوٹیوبر پر الزام ہے کہ انہوں نے اپنے سوشل میڈیا اکاؤنٹس پر ایک آن لائن جوئے کی موبائل ایپ کی تشہیر کی۔ استغاثے کا مؤقف ہے کہ ڈکی بھائی کا یہ عمل سائبر کرائم ایکٹ کے تحت جرم کے زمرے میں آتا ہے۔

ذرائع کے مطابق تفتیشی ادارے نے بتایا کہ ڈکی بھائی نے ویڈیوز اور پوسٹس کے ذریعے مذکورہ ایپ کی پروموشن کی، جس سے آن لائن جوئے کی حوصلہ افزائی ہوئی۔ تاہم، ڈکی بھائی کی قانونی ٹیم نے الزامات کو مسترد کرتے ہوئے کہا کہ ان کے موکل کے خلاف مقدمہ بے بنیاد ہے اور جلد حقائق واضح ہو جائیں گے۔