ہڈیوں کے درد کو کبھی معمولی نہ سمجھیں؛ ورنہ۔۔۔۔۔۔ ماہرین نے خطرے کی گھنٹی بجادی

عام طور پر لوگ ہڈیوں کے درد کو معمولی سمجھ کر نظر انداز کر دیتے ہیں، لیکن ماہرین کا کہنا ہے کہ بعض اوقات یہی درد ایک سنگین بیماری کی علامت بھی ہو سکتا ہے۔ خاص طور پر اگر درد مسلسل رہے یا بڑھتا جائے تو اس پر فوری توجہ دینا ضروری ہے۔

طبی ماہرین کے مطابق ہڈیوں کا کینسر ایک نایاب لیکن خطرناک بیماری ہے۔ یہ اس وقت پیدا ہوتا ہے جب ہڈی کے خلیات بے قابو ہو کر تیزی سے بڑھنے لگتے ہیں۔ اس عمل سے نہ صرف ہڈی کمزور ہوتی ہے بلکہ اردگرد کے ٹشوز بھی متاثر ہوتے ہیں۔

یہ بیماری زیادہ تر بازوؤں اور ٹانگوں کی لمبی ہڈیوں کو متاثر کرتی ہے۔ بچوں اور نوجوانوں میں اس کے کیسز نسبتاً زیادہ دیکھے جاتے ہیں۔ عام اقسام میں اوسٹیوسارکوما، ایونگ سارکوما اور کونڈروسارکوما شامل ہیں۔ اوسٹیوسارکوما زیادہ تر کم عمر افراد میں پایا جاتا ہے، جبکہ کونڈروسارکوما عموماً بڑی عمر کے لوگوں میں ہوتا ہے۔

ڈاکٹرز کا کہنا ہے کہ اس بیماری کی دو بنیادی اقسام ہوتی ہیں۔ ایک وہ جو ہڈی میں ہی شروع ہوتی ہے، جبکہ دوسری وہ جو جسم کے کسی اور حصے سے پھیل کر ہڈیوں تک پہنچتی ہے۔

وجوہات کے بارے میں ماہرین کا کہنا ہے کہ جینیاتی عوامل، زیادہ ریڈی ایشن کا سامنا اور دیگر کینسرز کا پھیلاؤ اس بیماری کا سبب بن سکتے ہیں۔ اگر خاندان میں پہلے کسی کو یہ مرض ہو چکا ہو تو خطرہ مزید بڑھ جاتا ہے۔

علامات شروع میں واضح نہیں ہوتیں، لیکن وقت کے ساتھ شدت اختیار کر لیتی ہیں۔ مسلسل ہڈیوں میں درد، سوجن، ہڈیوں کا کمزور ہونا، تھکن، وزن میں کمی اور رات کے وقت زیادہ پسینہ آنا اس کی عام علامات ہیں۔ بعض صورتوں میں معمولی چوٹ سے بھی ہڈی ٹوٹ سکتی ہے۔

تشخیص کے لیے ایکس رے، سی ٹی اسکین، ایم آر آئی اور بایوپسی جیسے ٹیسٹ کیے جاتے ہیں۔ علاج کا انحصار بیماری کی نوعیت اور شدت پر ہوتا ہے۔ عام طور پر سرجری، کیموتھراپی اور ریڈیوتھراپی کے ذریعے اس کا علاج کیا جاتا ہے۔

ماہرین نے زور دیا ہے کہ اگر کسی کو ہڈیوں میں مسلسل درد محسوس ہو تو اسے نظر انداز نہ کیا جائے۔ بروقت تشخیص سے نہ صرف علاج آسان ہو جاتا ہے بلکہ جان بچانے کے امکانات بھی بڑھ جاتے ہیں۔