امریکی سینیٹرز نے ایرانی اسکول پر حملے پر امریکی وزیر جنگ سے جواب طلب کرلیا

امریکی سینیٹرز کے ایک گروپ نے وزیر جنگ کو کڑی تنقید کا نشانہ بناتے ہوئے ایران کے خلاف جنگ میں عام شہریوں کی ہلاکتوں پر جواب طلبی کر لی ہے۔

گیارہ ڈیموکریٹک سینیٹرز کے ایک گروہ نے امریکی وزیر جنگ پیٹ ہیگزیتھ سے مطالبہ کیا ہے کہ وہ ایران کے خلاف جنگ کے دوران شہریوں کے تحفظ میں ناکامی اور خطرناک فیصلوں کی وضاحت پیش کریں۔

سینیٹر الزبتھ وارن اور کرس وان ہولن کی قیادت میں لکھے گئے اس خط میں ہیگزیتھ سے چار مئی تک جواب طلب کیا گیا ہے۔

سینیٹرز نے خدشہ ظاہر کیا ہے کہ ان کے کئی آپریشنل فیصلے وفاقی اور عالمی قوانین کی خلاف ورزی کے زمرے میں آتے ہیں، جس سے نہ صرف عام شہریوں بلکہ امریکی فوجیوں کی جانیں بھی خطرے میں پڑ گئیں۔

یہ بھی پڑھیں : ٹیکس چوروں کی جنت، امریکہ اور برطانیہ میں چھپی عالمی دولت سے متعلق انکشافات

خط میں فروری کے دوران ہونے والی چار مختلف بمباریوں کا حوالہ دیا گیا ہے، جن میں میناب کے ایک گرلز اسکول پر ہونے والا امریکہ اور اسرائیل کا مشترکہ حملہ بھی شامل ہے، جس میں 165 شہری جاں بحق ہوئے تھے۔

سینیٹرز نے ان واقعات کو روکے جانے والے سانحات قرار دیتے ہوئے کہا کہ موجودہ انتظامیہ فوجی کارروائیوں کے دوران انسانی نقصان کو کم کرنے کی اخلاقی اور قانونی ذمہ داری میں ناکام رہی ہے۔

مزید برآں، ہیگزیتھ کے اس بیان پر بھی سوالات اٹھائے گئے ہیں، جس میں انہوں نے دشمن کے لیے رحم نہ کرنے کی بات کی تھی، جسے عالمی قوانین کے منافی قرار دیا گیا ہے۔

سینیٹرز نے الزام لگایا کہ ہیگزیتھ نے عہدہ سنبھالتے ہی عام شہریوں کے تحفظ کے لیے قائم دفاتر کو بھی ختم کر دیا، جو کہ امریکی فوجی ساکھ کے لیے نقصان دہ ثابت ہوا۔