ایران نے امریکا سے مذاکرات کی بحالی کیلئے شرائط پیش کردیں

ایران نے امریکا کے ساتھ مذاکرات دوبارہ شروع کرنے کے لیے تین اہم شرائط پیش کردی ہیں۔

ایرانی قومی سلامتی کونسل کے سیکرٹری محسن رضائی نے الجزیرہ سے گفتگو کرتے ہوئے بتایا کہ ایران کسی بھی ممکنہ معاہدے سے پہلے جنگ کے خاتمے، منجمد اثاثوں کی بحالی اور امریکی بحری ناکہ بندی ختم کرنے کا مطالبہ کر رہا ہے۔ ایران کا مؤقف واضح ہے اور مذاکرات کی بحالی کے لیے ان شرائط پر پیش رفت ضروری ہوگی۔

ایرانی عہدیدار نے کہا کہ تہران قطری ثالث کے ساتھ مسلسل رابطے میں ہے۔ قطر نے ایران کے مطالبات واشنگٹن تک پہنچا دیے ہیں۔ اب ایران کو امریکا کی جانب سے جواب کا انتظار ہے۔ ان رابطوں کا مقصد دونوں ممالک کے درمیان جاری کشیدگی کو کم کرنا اور مذاکرات کی راہ ہموار کرنا ہے۔

محسن رضائی کے مطابق ایران اور امریکا کے درمیان کئی ماہ سے جاری جنگ کے دوران بالواسطہ سفارت کاری کا سلسلہ مکمل طور پر ختم نہیں ہوا۔ دونوں ممالک کے درمیان براہِ راست مذاکرات نہ ہونے کے باوجود ثالثوں کے ذریعے رابطے جاری رہے۔ اسلام آباد مفاہمتی یادداشت کے خاتمے کے بعد بھی یہ سفارتی کوششیں جاری رہیں۔

یاد رہے کہ پاکستان کی میزبانی میں جون میں ایران اور امریکا کے درمیان بات چیت ہوئی تھی۔ اس کے بعد اسلام آباد مفاہمتی یادداشت پر دستخط کیے گئے۔ اس یادداشت کا مقصد جنگ بندی اور مستقبل میں ایک وسیع تر معاہدے کے لیے بنیاد فراہم کرنا تھا۔ تاہم یہ سمجھوتا مستقل جنگ بندی میں تبدیل نہ ہوسکا اور اگست میں اس کی مدت ختم ہوگئی۔