روزانہ دہی کھانے کا یہ فائدہ آپ کو ضرور پسند آئے گا!!!

عمر بڑھنے کے ساتھ دماغی صحت کو بہتر اور فعال رکھنا ہر شخص کی خواہش ہوتی ہے۔

 ماہرین صحت کے مطابق اس مقصد کے لیے روزمرہ خوراک میں دہی کا استعمال بہت فائدہ مند ثابت ہو سکتا ہے۔ دہی نہ صرف جسم کو طاقت دیتا ہے بلکہ دماغی کارکردگی پر بھی مثبت اثر ڈالتا ہے۔

دہی میں کئی اہم غذائی اجزا موجود ہوتے ہیں جو جسم کی مجموعی صحت کے لیے ضروری ہیں۔ اس میں کیلشیئم پایا جاتا ہے جو ہڈیوں اور دانتوں کو مضبوط بناتا ہے۔ اسی طرح اس میں وٹامن بی 12 اور وٹامن بی 2 بھی شامل ہوتے ہیں جو دل کی بیماریوں سے بچاؤ میں مدد دیتے ہیں۔

ایک کپ دہی سے جسم کو روزانہ درکار فاسفورس کا تقریباً 28 فیصد، میگنیشم کا 10 فیصد اور پوٹاشیم کا 12 فیصد حاصل ہو جاتا ہے۔ یہ تمام اجزا جسم کے مختلف نظاموں کے لیے اہم کردار ادا کرتے ہیں۔ بلڈ پریشر کو متوازن رکھنا، میٹابولزم کو بہتر بنانا اور ہڈیوں کی صحت کو برقرار رکھنا ان میں شامل ہے۔

دہی کی سب سے اہم خصوصیت اس میں موجود پروبائیوٹکس ہیں۔ یہ فائدہ مند بیکٹیریا معدے کی صحت کو بہتر بناتے ہیں۔ یہ بیکٹیریا دماغ تک سگنلز بھیجنے والے مرکبات بنانے میں مدد دیتے ہیں، جس سے دماغی سرگرمیوں پر اثر پڑتا ہے۔ اس میں یادداشت، مزاج اور رویے جیسے عوامل شامل ہیں۔

امریکا کی اکیڈمی آف نیوٹریشن اینڈ ڈائیٹیکس کے مطابق دہی میں ایسے بیکٹیریا موجود ہوتے ہیں جو نظام ہاضمہ کو بہتر بناتے ہیں۔ یہ بیکٹیریا معدے میں توازن قائم رکھتے ہیں اور جسم میں مفید کیمیکل بنانے کے عمل میں مدد دیتے ہیں۔

ماہرین کا کہنا ہے کہ دہی دماغی صحت کے لیے بھی فائدہ مند ہے۔ اس کے استعمال سے سوزش کم ہوتی ہے اور ایسے اجزا بنتے ہیں جو دماغی افعال کو بہتر بناتے ہیں۔ اس سے ذہنی دباؤ اور یادداشت کے مسائل میں بھی بہتری آ سکتی ہے۔

ایک تحقیق میں یہ بھی سامنے آیا ہے کہ خمیر شدہ غذائیں انسان کے مزاج پر اثر ڈالتی ہیں۔ تجربات سے معلوم ہوا کہ جب معدے میں مفید بیکٹیریا کم ہو جائیں تو ڈپریشن اور ذہنی دباؤ کی علامات بڑھ سکتی ہیں۔ اس سے یہ بات واضح ہوتی ہے کہ معدے کی صحت اور دماغی کیفیت آپس میں گہرا تعلق رکھتی ہیں۔