پاکستان نے لکیر کھینچ دی ہے، اب کسی بھی مہم جوئی کا جواب فیصلہ کن ہوگا، خواجہ آصف

خواجہ آصف نے بھارت کو سخت ترین الفاظ میں خبردار کرتے ہوئے کہا ہے کہ پاکستان نے اپنی سرخ لکیر کھینچ دی ہے اور اب کسی بھی قسم کی غلط فہمی یا مہم جوئی کا جواب پہلے سے کہیں زیادہ شدید اور فیصلہ کن ہوگا۔

پاکستان کے وزیر دفاع خواجہ آصف نے دشمن ملک بالخصوص بھارت کو واضح پیغام دیتے ہوئے کہا ہے کہ ماضی کی مہم جوئیوں پر ہمارا صبر و تحمل ہماری کمزوری نہیں بلکہ ضبط کا مظہر تھا، تاہم اب حالات بدل چکے ہیں۔

انہوں نے معرکہ حق کا ایک سال مکمل ہونے پر جاری بیان میں کہا کہ ہم نے ایک لکیر کھینچ دی ہے اور جو کوئی بھی اس لکیر کے دوسری طرف ہے، اسے یہ بات واضح طور پر سمجھ لینی چاہیے کہ آئندہ کسی بھی غلط اندازے یا حساب کتاب کی صورت میں ہمارا ردعمل انتہائی شدت پسندانہ اور فیصلہ کن ہوگا۔

خواجہ آصف نے زور دے کر کہا کہ پاکستان اب صرف جواب نہیں دیتا بلکہ وہ نتائج کی صحیح سمت کا تعین بھی کرتا ہے۔ ان کا کہنا تھا کہ ہمارے خلاف کی جانے والی کوئی بھی مہم جوئی اب محدود نہیں رہے گی بلکہ یہ ہم طے کریں گے کہ یہ جنگ کیسے شروع ہوگی، کیا رخ اختیار کرے گی اور کس انجام کو پہنچے گی۔

وزیر دفاع نے مزید کہا کہ اگر کسی نے یہ سمجھا ہے کہ پاکستان پر دباؤ ڈالا جا سکتا ہے یا اسے تنہا کیا جا سکتا ہے، تو ’معرکہِ حق‘ نے اس غلط تصور کو ہمیشہ کے لیے دفن کر دیا ہے۔

ان کا کہنا تھا کہ آج ہماری جوابی صلاحیت بری، بحری اور فضائی میدانوں میں کسی کے تصور سے بھی زیادہ تیز، مؤثر اور مربوط ہے۔

یہ بھی پڑھیں : بھارتی جارحیت کیخلاف پاکستان کا عالمی سطح پر ذمہ دارانہ دو ٹوک مؤقف اور بھرپور دفاعی عزم

انہوں نے بھارت کو مخاطب کرتے ہوئے کہا کہ ڈرامہ بازی، فالس فلیگ کارروائیوں اور گھسے پٹے طرزِ عمل کو دہرانے کی گنجائش ختم ہو چکی ہے اور اب ایسی کسی بھی کوشش کی قیمت خودکشی کے مترادف ہوگی۔

خواجہ آصف نے قومی یگانگت کو ریاست کی اصل طاقت قرار دیتے ہوئے کہا کہ قوم، ریاست اور مسلح افواج ایک ہی سمت میں گامزن ہیں اور اسی طاقت نے خطے میں طاقت کا توازن مکمل طور پر تبدیل کر دیا ہے۔

انہوں نے واضح کیا کہ پاکستان ہمیشہ امن کا خواہاں ہے لیکن ایسا امن ہرگز قبول نہیں، جس میں وقار، سلامتی اور خود مختاری کا احترام نہ ہو، کیونکہ ایسا امن ’سرنڈر‘ کے مترادف ہوتا ہے، جو ہمیں کسی صورت منظور نہیں۔

وزیر دفاع نے پاکستانی نوجوان نسل کے عزم و اعتماد کی تعریف کرتے ہوئے کہا کہ آج کا نوجوان مکمل باخبر اور پاکستان کے ساتھ جذباتی طور پر وابستہ ہے، اور یہی جذبہ ملک کے روشن مستقبل کی سب سے بڑی طاقت ہے۔

انہوں نے دشمن کو مخلصانہ مشورہ دیا کہ وہ اپنی داخلی سیاست اور نفرت کو سرحد پار نہ لائیں، ورنہ ایسے ردعمل کے لیے تیار رہیں جسے وہ قابو نہیں کر سکیں گے اور نہ ہی اس کی کوئی توجیہ پیش کر سکیں گے۔