عالمی منڈی میں سونے کی قیمت مسلسل تیسرے روز بڑھ گئی، بڑی وجہ سامنے آگئی

عالمی مارکیٹ میں سونے کی قیمتوں میں مسلسل تیسرے روز بھی اضافہ ریکارڈ کیا گیا ہے، جس کی بڑی وجہ امریکی ڈالر کی کمزوری اور امریکا و ایران کے درمیان ممکنہ امن معاہدے کی امیدیں قرار دی جا رہی ہیں۔

بین الاقوامی مارکیٹ میں اسپاٹ گولڈ کی قیمت 0.3 فیصد اضافے کے بعد 4 ہزار 701 ڈالر 19 سینٹ فی اونس تک پہنچ گئی، جبکہ امریکی گولڈ فیوچرز میں بھی 0.4 فیصد اضافہ دیکھا گیا۔

ایران نے بدھ کے روز کہا کہ وہ امریکا کی جانب سے دی گئی امن تجویز کا جائزہ لے رہا ہے۔ ذرائع کے مطابق مجوزہ معاہدہ جنگ کے باضابطہ خاتمے کا باعث بن سکتا ہے، تاہم ایران کے جوہری پروگرام اور آبنائے ہرمز سے متعلق معاملات اب بھی زیر غور ہیں۔

مارکیٹ تجزیہ کار ایڈورڈ میئر نے کہا کہ امریکی ڈالر کی کمزوری اور ٹریژری بانڈز کی کم ہوتی شرح منافع نے سونے کی قیمتوں کو سہارا دیا ہے۔ انہوں نے کہا کہ معاہدہ ابھی ابتدائی مرحلے میں ہے اور صورتحال میں تبدیلی بھی آ سکتی ہے۔

ان کے مطابق قلیل مدت میں سونے کی قیمت 4 ہزار 600 سے 5 ہزار 100 ڈالر فی اونس کے درمیان رہنے کا امکان ہے۔

دوسری جانب عالمی منڈی میں برینٹ خام تیل کی قیمتوں میں بھی اس ہفتے تقریباً 6 فیصد کمی دیکھی گئی ہے، کیونکہ مشرق وسطیٰ میں کشیدگی کم ہونے اور جنگ بندی کی امیدیں بڑھ رہی ہیں۔

معاشی ماہرین کا کہنا ہے کہ خام تیل کی بلند قیمتیں مہنگائی اور شرح سود میں اضافے کا باعث بن سکتی ہیں، جبکہ زیادہ شرح سود سونے جیسے نفع نہ دینے والے اثاثوں کی طلب پر اثر ڈالتی ہے۔

سرمایہ کار اب جمعے کو جاری ہونے والی امریکی روزگار رپورٹ پر نظریں جمائے ہوئے ہیں، جس سے فیڈرل ریزرو کی آئندہ مالیاتی پالیسی کے حوالے سے اہم اشارے ملنے کی توقع ہے۔