روزانہ کتنے کپ چائے پینا صحت کیلئے مفید ہوتا ہے؟ ماہرین کی رائے سامنے آگئی

چائے پاکستان میں سب سے زیادہ استعمال ہونے والا مشروب ہے۔ تقریباً ہر گھر میں دن کا آغاز اور اختتام چائے کے کپ کے ساتھ ہوتا ہے۔ کچھ لوگ تو دن بھر کئی بار چائے پیتے ہیں۔

لیکن سوال یہ ہے کہ روزانہ کتنی چائے صحت کے لیے فائدہ مند ہے اور کب یہ نقصان دہ ہو سکتی ہے؟

چائے میں کیا پایا جاتا ہے؟

چائے میں کیفین، فلورائیڈ اور فلیوونولز جیسے اہم اجزاء موجود ہوتے ہیں۔ یہ اجزاء جسم کے لیے فائدہ مند بھی ہوتے ہیں۔ تحقیق کے مطابق چائے دل کی بیماریوں، ذیابیطس اور کچھ دیگر امراض کے خطرے کو کم کرنے میں مدد دے سکتی ہے۔

زیادہ چائے پینے کے نقصانات

ایک اندازے کے مطابق ایک کپ چائے میں تقریباً 40 ملی گرام کیفین ہوتی ہے۔ کیفین ذہنی طور پر چست رکھنے میں مدد دیتی ہے، لیکن اس کی زیادہ مقدار نقصان بھی پہنچا سکتی ہے۔

زیادہ چائے پینے سے دل کی دھڑکن تیز ہو سکتی ہے اور بلڈ پریشر بڑھ سکتا ہے۔ اس کے علاوہ جسم میں تھکن اور بے چینی بھی محسوس ہو سکتی ہے۔

ماہرین کے مطابق زیادہ چائے پینے سے آئرن کے جذب ہونے میں بھی مسئلہ پیدا ہو سکتا ہے۔ کچھ ادویات کے اثرات پر بھی اس کا اثر پڑ سکتا ہے۔

روزانہ کتنی چائے مناسب ہے؟

مختلف تحقیقی رپورٹس کے مطابق روزانہ 2 سے 4 کپ چائے پینا محفوظ سمجھا جاتا ہے۔ کچھ مطالعات میں 10 کپ تک کو بھی نقصان دہ نہیں کہا گیا، لیکن یہ ہر شخص کے جسم پر منحصر ہے۔

طبی ماہرین کی عمومی رائے یہ ہے کہ زیادہ تر افراد کے لیے روزانہ 3 سے 5 کپ چائے پینا محفوظ ہے۔

اگر اس سے زیادہ استعمال کیا جائے تو اس کے منفی اثرات سامنے آ سکتے ہیں۔