لمبی اور صحت مند زندگی کیلئے ہر ہفتے کتنی ورزش کرنا چاہیے؟ ماہرین نے بتادیا

اگر آپ اپنی صحت بہتر بنانا چاہتے ہیں تو گھنٹوں جم میں وقت گزارنا ضروری نہیں۔ ایک نئی تحقیق میں یہ بات سامنے آئی ہے کہ ہفتے میں صرف 30 منٹ کی سخت ورزش بھی جسمانی صحت میں نمایاں بہتری لا سکتی ہے۔

یہ تحقیق ناروے کی یونیورسٹی آف سائنس اینڈ ٹیکنالوجی میں کی گئی۔ اس میں بتایا گیا کہ زیادہ تر لوگ سمجھتے ہیں کہ صحت کے لیے لمبے وقت کی ورزش ضروری ہے، لیکن حقیقت اس کے برعکس بھی ہو سکتی ہے۔

ماہرین کے مطابق عام طور پر 150 منٹ ہفتہ وار ورزش کی تجویز دی جاتی ہے، مگر بہت سے افراد اس ہدف تک نہیں پہنچ پاتے۔ اسی مسئلے کو دیکھتے ہوئے محققین نے کم وقت میں زیادہ فائدہ دینے والی ورزشوں کا جائزہ لیا۔

تحقیق میں بتایا گیا کہ صرف 30 منٹ کی تیز یا سخت ورزش سے بھی دل اور پھیپھڑوں کی کارکردگی بہتر ہو سکتی ہے۔ اس کا مطلب یہ ہے کہ روزانہ چند منٹ یا ہر دوسرے دن مختصر مگر تیز ورزش بھی کافی فائدہ دے سکتی ہے۔

ورزش کی شدت اہم ہے۔ ماہرین نے وضاحت کی کہ ایسی ورزش ہونی چاہیے جس میں سانس تیز ہو جائے، بات کرنا مشکل ہو مگر تھوڑے الفاظ بولے جا سکیں۔ یہ کیفیت جسم پر مثبت اثر ڈالتی ہے۔

تیز واک، دوڑ، سائیکلنگ، تیراکی اور سیڑھیاں چڑھنا ایسی سرگرمیاں ہیں جو دل کی دھڑکن بڑھاتی ہیں اور جسم میں آکسیجن کی بہتر گردش کو یقینی بناتی ہیں۔ اس سے کارڈیو فٹنس بہتر ہوتی ہے۔

کارڈیو فٹنس کا مطلب یہ ہے کہ جسم آکسیجن کو بہتر طریقے سے استعمال کرے۔ اس سے دل، پھیپھڑوں اور دیگر اعضا کی کارکردگی بہتر ہوتی ہے اور مجموعی صحت میں بہتری آتی ہے۔

ماہرین کا کہنا ہے کہ اچھی کارڈیو فٹنس سے کئی بیماریوں اور قبل از وقت موت کے خطرات میں 40 سے 50 فیصد تک کمی آ سکتی ہے۔ اسی لیے باقاعدہ ورزش کو معمول بنانا ضروری ہے۔

تحقیق میں یہ بھی کہا گیا کہ ورزش کو چھوڑنے کے بعد جسمانی فٹنس تیزی سے کم ہو جاتی ہے، اس لیے مستقل مزاجی زیادہ اہم ہے۔ روزانہ چند منٹ کی تیز سرگرمی بھی صحت کے لیے فائدہ مند ثابت ہو سکتی ہے۔