اسرائیل نے مشرق وسطیٰ کے مزید ایک ہزار کلومیٹر رقبے پر قبضہ کر لیا، فنانشل ٹائمز

فنانشل ٹائمز کے مطابق اسرائیل نے نئی جنگی حکمت عملی کے تحت مشرق وسطیٰ کے ایک ہزار مربع کلومیٹر سے زائد علاقے پر باقاعدہ قبضہ جما لیا ہے، جس میں غزہ، لبنان اور شام کے اہم علاقے شامل ہیں۔

برطانوی جریدے فنانشل ٹائمز کی رپورٹ کے مطابق اسرائیل نے خطے میں جاری کشیدگی کا فائدہ اٹھاتے ہوئے مشرق وسطیٰ کے مختلف ممالک اور محاذوں پر مجموعی طور پر ایک ہزار مربع کلومیٹر کے وسیع تر علاقے پر اپنا غاصبانہ قبضہ مکمل طور پر قائم کر لیا ہے۔

رپورٹ میں بتایا گیا ہے کہ اسرائیلی فوج نے اس نئی توسیعی مہم کے دوران غزہ کی پٹی، جنوبی لبنان اور شام کے تزویراتی طور پر اہم سرحدی علاقوں کو اپنے کنٹرول میں لے لیا ہے۔

یہ بھی پڑھیں : حزب اللہ کو توڑنا ناممکن ہے اور وہ آج بھی پوری طاقت سے کھڑی ہے، اسرائیلی کمانڈ کا اعتراف

فنانشل ٹائمز کی رپورٹ کے مطابق اسرائیلی فوج اس وقت غزہ کی پٹی کے نصف سے زائد حصے پر عملاً قابض ہو چکی ہے اور وہاں مستقل فوجی چوکیاں قائم کی جا رہی ہیں۔

اس کے ساتھ ہی اسرائیل نے عالمی قوانین کی خلاف ورزی کرتے ہوئے حزب اللہ کی کارروائیوں کو روکنے کے بہانے جنوبی لبنان کے اندر ایک باقاعدہ سیکیورٹی زون بھی قائم کر رکھا ہے، جہاں اس کی فوجیں گشت کر رہی ہیں۔

جریدے نے خبردار کیا ہے کہ تل ابیب کی اس نئی اور جارحانہ حکمت عملی نے مشرق وسطیٰ کو ایک مہیب جنگ کے دھانے پر دھکیل دیا ہے اور اس قبضے کی وجہ سے خطے میں جاری کشیدگی اور خونی تصادم میں غیر معمولی حد تک اضافہ ہو چکا ہے، جس کے اثرات عالمی امن پر مرتب ہو رہے ہیں۔