بجٹ میں تنخواہ دار طبقے کے لیے ڈبل خوشخبری

وفاقی حکومت آئندہ مالی سال 2026-27 کا بجٹ 5 جون کو پیش کرنے جا رہی ہے۔

 بجٹ سے قبل مختلف شعبوں کے لیے تجاویز پر غور جاری ہے۔ اس دوران تنخواہ دار طبقے اور پنشنرز کے لیے ممکنہ ریلیف کی خبریں سامنے آنے کے بعد سرکاری ملازمین اور متوسط طبقے میں امید کی لہر دوڑ گئی ہے۔

ذرائع کے مطابق حکومت نئے بجٹ میں سرکاری ملازمین کی تنخواہوں میں اضافے پر سنجیدگی سے غور کر رہی ہے۔ ابتدائی تجاویز کے تحت تنخواہوں میں تقریباً 10 فیصد تک اضافہ کیا جا سکتا ہے۔

بجٹ دستاویزات کی تیاری کے دوران حکومت مختلف الاؤنسز کے نظام میں بھی تبدیلیوں پر غور کر رہی ہے۔ موجودہ چار ایڈہاک الاؤنسز میں سے ایک الاؤنس کو بنیادی تنخواہ کا حصہ بنانے کی تجویز زیر غور ہے۔ اس اقدام سے مستقبل میں تنخواہوں اور دیگر مالی مراعات کے تعین میں ملازمین کو فائدہ پہنچ سکتا ہے۔

تنخواہ دار طبقے کے لیے ایک اور اہم تجویز انکم ٹیکس میں ریلیف سے متعلق ہے۔ سالانہ 12 لاکھ سے 22 لاکھ روپے تک آمدن رکھنے والے افراد کے لیے ٹیکس کی شرح میں کمی پر غور کیا جا رہا ہے۔ اگر ایسا ہوتا ہے تو متوسط آمدن والے ملازمین کی ماہانہ بچت میں اضافہ ہو سکتا ہے۔

ذرائع کے مطابق ماہانہ ایک لاکھ سے دو لاکھ روپے تنخواہ حاصل کرنے والے افراد کو بھی خصوصی ریلیف دینے کی تجاویز زیر بحث ہیں۔ حکومت کی کوشش ہے کہ مہنگائی کے دباؤ سے متاثر ہونے والے طبقے کو کچھ حد تک مالی سہولت فراہم کی جائے۔

دوسری جانب بجٹ پیش ہونے سے ایک روز قبل 4 جون کو قومی اقتصادی سروے جاری کیا جائے گا۔ اس رپورٹ میں ملکی معیشت، ترقیاتی اہداف، زراعت، صنعت، تجارت اور دیگر شعبوں کی سالانہ کارکردگی کا جائزہ پیش کیا جائے گا۔ بجٹ کی منظوری سے قبل وفاقی کابینہ کا خصوصی اجلاس بھی 5 جون کو متوقع ہے۔