امریکا ایران ممکنہ معاہدہ؛ پاکستان اسٹاک میں رواں ہفتے 6 ہزار سے زائد پوائنٹس کا اضافہ

 امریکا اور ایران کے درمیان ممکنہ معاہدے سے متعلق مثبت خبروں نے عالمی مالیاتی منڈیوں کے ساتھ ساتھ پاکستان کی اسٹاک مارکیٹ پر بھی اچھے اثرات مرتب کیے ہیں۔

ہفتہ وار اعداد و شمار کے مطابق پاکستان اسٹاک ایکسچینج کا 100 انڈیکس 6118 پوائنٹس کے نمایاں اضافے کے بعد 173962 پوائنٹس پر بند ہوا۔ پورے ہفتے کے دوران مارکیٹ میں اتار چڑھاؤ بھی دیکھنے میں آیا اور انڈیکس تقریباً 3944 پوائنٹس کے بینڈ میں رہا۔

 کاروباری ہفتے کے دوران 100 انڈیکس کی بلند ترین سطح 174106 پوائنٹس جبکہ کم ترین سطح 170161 پوائنٹس ریکارڈ کی گئی۔

مارکیٹ میں سرمایہ کاروں کی دلچسپی کا اندازہ اس بات سے بھی لگایا جا سکتا ہے کہ ایک ہفتے کے دوران 1.06 ارب سے زائد شیئرز کی خرید و فروخت ہوئی۔ ان سودوں کی مجموعی مالیت تقریباً 72 ارب روپے رہی۔

اسی دوران پاکستان اسٹاک ایکسچینج کی مجموعی مارکیٹ کیپٹلائزیشن میں بھی نمایاں اضافہ ہوا۔ ایک ہفتے کے اندر مارکیٹ ویلیو 549 ارب روپے بڑھ گئی، جس کے بعد مجموعی مارکیٹ کیپٹلائزیشن 19166 ارب روپے تک پہنچ گئی۔