اسرائیل اور لبنان کے درمیان مذاکرات کا چوتھا دور مکمل، جامع معاہدے کیلئے پیش رفت

امریکی نگرانی کے تحت اسرائیل اور لبنان کے وفود کے درمیان براہ راست مذاکرات کا چوتھا دور منعقد ہوا، جس میں سیاسی اور سیکیورٹی امور پر اہم پیش رفت ہوئی ہے۔

امریکی وزارت خارجہ میں اسرائیل اور لبنان کے اعلیٰ سطح کے وفود کے درمیان براہ راست مذاکرات کا چوتھا دور کامیابی سے منعقد ہوا ہے۔ یہ اہم مذاکرات مکمل طور پر امریکی سرپرستی اور نگرانی میں ہو رہے ہیں۔

یہ بھی پڑھیں : اسرائیل کی لبنان میں زخمیوں کی مدد کرنے والے ریسکیو ورکرز پر حملوں پر تحقیقاتی رپورٹ جاری

امریکی حکام کے مطابق اس بیٹھک کے دوران سیاسی اور سیکیورٹی کے شعبوں میں مثبت پیش رفت جاری ہے۔ اس عمل کا مقصد گزشتہ 20 سال کی سفارتی ناکامیوں کو پیچھے چھوڑ کر ایک ایسے جامع معاہدے کی طرف بڑھنا ہے، جس کے ذریعے لبنان کی قومی خودمختاری کو بحال کیا جا سکے اور ساتھ ہی اسرائیل کی سیکیورٹی کو بھی یقینی بنایا جا سکے۔

امریکہ نے اس عزم کا اعادہ کیا ہے کہ وہ ان تاریخی اور اہم ترین مذاکرات کو منطقی انجام تک پہنچانے اور دونوں ملکوں کے درمیان معاملات کو آسان بنانے کے لیے مکمل طور پر متحرک اور پرعزم ہے۔

سفارتی کوششوں کے اس سلسلے کو برقرار رکھتے ہوئے اسرائیل اور لبنان کے وفود کے مابین مذاکرات کا اگلا دور کل دوبارہ منعقد کیا جائے گا، جس میں اب تک ہونے والی پیش رفت کو مزید آگے بڑھایا جائے گا۔