ایران کی بیشتر جوہری تنصیبات تک رسائی حاصل کرنے سے قاصر ہیں، عالمی ایٹمی ایجنسی

عالمی ایٹمی توانائی ایجنسی کا کہنا ہے کہ وہ ایران کی بیشتر جوہری تنصیبات تک رسائی حاصل کرنے سے اب بھی قاصر ہے، جس سے اس کی تصدیق کرنے کی صلاحیت محدود ہو گئی ہے۔

عالمی ایٹمی توانائی ایجنسی کے مطابق وہ بوشہر نیوکلیئر پاور پلانٹ کے علاوہ ایران کی بیشتر جوہری تنصیبات تک رسائی حاصل کرنے سے اب بھی قاصر ہے، جس کی وجہ سے ایران کی جوہری سرگرمیوں کی نگرانی اور ان کی مکمل تصدیق کرنے کی اس کی صلاحیت بری طرح محدود ہو کر رہ گئی ہے۔

فرانس پریس کی جانب سے شائع کردہ ایک رپورٹ کے مطابق ایجنسی کا کہنا تھا کہ اسے ایران میں غیر اعلانیہ جوہری سرگرمیوں اور خفیہ مواد کے ممکنہ وجود کے بارے میں شدید خدشات لاحق ہیں۔

یہ بھی پڑھیں : برطانیہ اور فرانس کی ایران کی بچھائی گئی مائنز ہٹانے کیلئے تیاریاں آخری مراحل میں داخل

ایجنسی کے مطابق ایران کے جوہری پروگرام سے وابستہ بعض مقامات اور ان کی سرگرمیوں سے متعلق اہم معلومات میں مسلسل خلاء موجود ہے، جسے پُر کرنا ضروری ہے۔

آئی اے ای اے نے مزید کہا کہ وہ معائنے اور جوہری تنصیبات تک رسائی پر عائد پابندیوں کے سائے میں ایران کے پاس موجود اعلیٰ افزودہ یورینیم کے ذخیرے کے حجم اور اسے رکھنے کی جگہ کی تصدیق کرنے میں اپنی نااہلی پر بڑھتی ہوئی تشویش محسوس کر رہی ہے۔

رپورٹ میں کہا گیا ہے کہ اگرچہ ایجنسی یہ تسلیم کرتی ہے کہ ایران کی جوہری تنصیبات اور مقامات پر ہونے والے فوجی حملوں نے ایک غیر معمولی اور مشکل صورتحال پیدا کی ہے، لیکن اس کے باوجود بغیر کسی تاخیر کے ایران میں تصدیقی سرگرمیاں انجام دینا عالمی امن کے لیے انتہائی اہمیت کا حامل ہے۔