مضبوط ایران کا خوفناک خواب اب مغرب کیلئے سچ ثابت ہورہا ہے، مشیر سپریم لیڈر ایران

مشیر ایرانی سپریم لیڈر برائے خارجہ امور ڈاکٹر علی اکبر ولایتی کا کہنا ہے کہ مضبوط ایران کا خوفناک خواب اب مغرب کیلئے سچ ثابت ہورہا ہے۔

 ایران کے سپریم لیڈر آیت اللہ مجبتیٰ خامنہ ای کے مشیر برائے خارجہ امور ڈاکٹر علی اکبر ولایتی کا کہنا ہے کہ ایران کے مضبوط اور بااثر ملک بننے سے متعلق مغربی دنیا کا دیرینہ خدشہ اب حقیقت کی شکل اختیار کر چکا ہے۔ ایران نہ صرف اپنی پوزیشن مستحکم کر رہا ہے بلکہ خطے میں طاقت کا توازن بھی تیزی سے تبدیل ہو رہا ہے۔

انہوں نے کہا کہ موجودہ علاقائی حالات مشرق وسطیٰ کے سیاسی اور تزویراتی نقشے کو نئی شکل دے رہے ہیں۔ ایران مختلف چیلنجز کے باوجود پہلے سے زیادہ مضبوط ہو کر سامنے آیا ہے اور خطے میں اس کا کردار مزید اہم ہوتا جا رہا ہے۔

1)Batılı stratejistlerin yıllardır korktuğu kabus gerçek oldu İran güçleniyor ve stratejik harita yeniden çiziliyor Reuters ve Guardian itiraf etti:Trump, Hürmüz’ü yeniden açmak için geçici bir anlaşmaya muhtaç. Bu,’İran’a baskı’ doktrininin çöküşü ve direniş ekseninin zaferidir

— Aliakbar Velayati (@Drvelayati_ir) June 6, 2026

ڈاکٹر علی اکبر ولایتی نے امریکی صدر ڈونلڈ ٹرمپ کی پالیسیوں پر بھی تنقید کرتے ہوئے کہا کہ امریکا کو آبنائے ہرمز میں معمول کی صورتحال بحال کرنے کے لیے عارضی نوعیت کے معاہدوں کی ضرورت پیش آ رہی ہے۔ بعض قوتیں خطے میں فوری سمجھوتوں اور عارضی سیاسی حل کی امید لگائے بیٹھی ہیں، لیکن ایسا سوچنا ایک بڑی تزویراتی غلطی ثابت ہو سکتا ہے۔

علی اکبر ولایتی نے کہا کہ خطے میں طاقت کے نئے توازن کو نظر انداز نہیں کیا جا سکتا۔ مزاحمتی قوتوں کو کمزور کر کے پائیدار علاقائی نظام قائم نہیں کیا جا سکتا۔ موجودہ حالات کو سمجھنے کے لیے زمینی حقائق کو مدنظر رکھنا ضروری ہے۔

مشیر ایرانی سپریم لیڈر برائے خارجہ امور نے کہا کہ سفارتی معاملات میں غیر حقیقی توقعات اور خوش فہمیاں اکثر مہنگی ثابت ہوتی ہیں۔ دیرپا امن صرف طاقت کے متوازن نظام اور حقیقت پسندانہ پالیسیوں کے ذریعے ہی ممکن بنایا جا سکتا ہے۔ محض دعوؤں اور بیانات سے خطے میں استحکام پیدا نہیں ہو سکتا۔