وفاقی حکومت کی قومی بجٹ عاشورہ سے قبل منظور کرانے کی حکمت عملی

وفاقی حکومت نے قومی بجٹ عاشورہ محرم الحرام کی چھٹیوں سے قبل 24 جون تک قومی اسمبلی سے منظور کرانے کی حکمت عملی تیار کر لی ہے۔

پارلیمانی ذرائع کے مطابق حکومت قومی اسمبلی میں بجٹ پر جاری بحث کے 40 گھنٹے پورے ہوتے ہی اس سلسلے کو سمیٹنے کا ارادہ رکھتی ہے اور اب تک 27 گھنٹے سے زائد کی بحث مکمل ہو چکی ہے۔

اپوزیشن کی طرف سے پیش کی جانے والی کٹوتی کی تحاریک کو صرف ایک دن کے اندر نمٹا دیا جائے گا۔ اس کے فوراً بعد وزیر خزانہ کی طرف سے بحث سمیٹنے کے ساتھ فنانس بل اور سپلیمنٹری گرانٹس کی منظوری کا طویل مرحلہ صرف 2 دنوں میں مکمل کیا جائے گا۔

بھی پڑھیں : وفاقی بجٹ عوام دوست ہے، استحکام کیلئے میثاق معیشت کی پیشکش اب بھی برقرار ہے، عطاء تارڑ

ذرائع کا کہنا ہے کہ حکومت 24 جون سے قبل بجٹ پاس کرانا چاہتی ہے تاکہ 25 جون سے شروع ہونے والی محرم کی چھٹیوں سے پہلے کام مکمل کر کے قومی اسمبلی کا اجلاس غیر معینہ مدت کے لیے ملتوی کیا جا سکے۔

اس مقصد کے لیے حکومتی اور اتحادی جماعتوں کے ارکان پر بدھ تک شہر سے باہر جانے پر سخت پابندی عائد کر دی گئی ہے۔

وزیراعظم شہباز شریف کی ایوان میں مسلسل حاضری بھی ارکان کی تعداد کو پورا رکھنے کی حکمت عملی کا حصہ ہے۔ بجٹ پر حکومت اور اپوزیشن کے تمام اہم رہنما اپنی تجاویز دے چکے ہیں۔