سگریٹ چھوڑ کر ویپنگ کرنے والوں میں آنکھوں کی بیماریوں کا خطرہ مکمل ختم نہیں ہوتا، تحقیق

طبی ماہرین اکثر سگریٹ چھوڑنے کے لیے ویپنگ (ای سگریٹ) یا نکوٹین کی دیگر مصنوعات کا مشورہ دیتے ہیں۔

عام طور پر لوگ سمجھتے ہیں کہ یہ متبادل طریقے صحت کے لیے بالکل نقصان دہ نہیں ہیں۔ لیکن اب ایک نئی اور بڑی طبی تحقیق نے اس حوالے سے ایک اہم خطرے کی طرف اشارہ کیا ہے۔ تحقیق کے مطابق سگریٹ چھوڑنے کے بعد ویپ یا ای سگریٹ استعمال کرنے سے آنکھوں کی بیماریوں کا خطرہ ختم نہیں ہوتا۔

یہ اہم تحقیق جنوبی کوریا میں واقع "کوریا یونیورسٹی کالج آف میڈیسن” کے ماہرین نے کی ہے۔ انہوں نے اس مطالعے کے لیے وہاں کے قومی ہیلتھ انشورنس ڈیٹا کا استعمال کیا۔ تحقیق میں 32 ہزار 316 ایسے افراد کو شامل کیا گیا جو پہلے سگریٹ پیتے تھے لیکن اب وہ سگریٹ چھوڑ چکے تھے۔

 ماہرین نے ان تمام لوگوں کی صحت کا اوسطاً ساڑھے چار سال (4.6 سال) تک جائزہ لیا۔ اس طویل جائزے کے بعد سامنے آنے والے نتائج کو مشہور طبی جریدے "امریکن جرنل آف اوفتھلمولوجی” میں چھاپا گیا ہے۔

تحقیق کے دوران ماہرین نے ان سابق تمباکو نوش افراد کو دو الگ الگ گروپوں میں بانٹا۔ پہلے گروپ میں وہ لوگ شامل تھے جنہوں نے سگریٹ کے ساتھ ساتھ نکوٹین کا استعمال بھی مکمل طور پر بند کر دیا تھا۔ دوسرے گروپ میں وہ لوگ رکھے گئے جنہوں نے روایتی سگریٹ تو چھوڑ دی تھی، لیکن وہ اب نکوٹین کی متبادل مصنوعات جیسے ویپ یا ای سگریٹ کا استعمال کر رہے تھے۔

جب ساڑھے چار سال کا عرصہ پورا ہوا تو دونوں گروپوں میں آنکھوں کی بیماریوں کے مجموعی طور پر 6 ہزار 328 نئے کیسز سامنے آئے۔ اعداد و شمار سے معلوم ہوا کہ جن لوگوں نے نکوٹین کو اپنے جسم سے مکمل طور پر نکال دیا تھا، ان میں آنکھوں کی بیماریوں کی شرح کم تھی۔ اس گروپ میں ہر ایک ہزار افراد میں سے سالانہ تقریباً 41 لوگوں میں یہ بیماریاں دیکھیں۔

 دوسری طرف ویپ یا ای سگریٹ استعمال کرنے والوں میں یہ شرح زیادہ تھی۔ اس دوسرے گروپ میں ہر ایک ہزار افراد میں سے سالانہ 44 لوگوں کو آنکھوں کے مسائل کا سامنا کرنا پڑا۔

جب ماہرین نے ان دونوں گروپوں کے اعداد و شمار کا گہرا تجزیہ کیا تو حیران کن باتیں سامنے آئیں۔ نکوٹین کی متبادل مصنوعات استعمال کرنے والوں میں آنکھوں کی بیماریوں کا مجموعی خطرہ 7 فیصد زیادہ پایا گیا۔

 سب سے زیادہ پریشان کن اثر ذیابیطس (شوگر) کے مریضوں پر دیکھا گیا۔ ویپنگ کرنے والے شوگر کے مریضوں میں آنکھ کی ایک خطرناک بیماری "ڈائیبیٹک ریٹینوپیتھی” کا خطرہ 24 فیصد تک بڑھ گیا۔ یہ بیماری آنکھ کے پچھلے حصے کے خون کے خلیات کو نقصان پہنچاتی ہے۔ اس کے علاوہ، ان لوگوں میں آنکھ کی فوکس کرنے کی صلاحیت یعنی کسی چیز پر نظر جمانے کے مسائل بھی زیادہ دیکھے گئے۔

اس تحقیق میں یہ صاف طور پر نہیں بتایا گیا کہ کیا ویپنگ سے انسان مکمل اندھا ہو سکتا ہے یا نہیں۔ تاہم ماہرین کا کہنا ہے کہ اگر آنکھوں کی ان بیماریوں کا بروقت علاج نہ کیا جائے تو کچھ نایاب صورتوں میں نظر جانے کا خطرہ ہو سکتا ہے۔