فیفا ورلڈکپ 2026: پانچ سال پرانی پیشگوئی دوبارہ وائرل

فیفا ورلڈکپ 2026 کے دونوں سیمی فائنلز مکمل ہونے کے بعد سوشل میڈیا پر پانچ سال پرانی ایک پوسٹ ایک بار پھر توجہ کا مرکز بن گئی ہے۔

 اس پوسٹ میں نہ صرف ٹورنامنٹ کے ممکنہ فائنلسٹ ٹیموں کا ذکر کیا گیا تھا بلکہ فاتح ٹیم کے بارے میں بھی پیشگوئی کی گئی تھی۔ سیمی فائنلز کے نتائج سامنے آنے کے بعد اس پوسٹ کو لاکھوں افراد دوبارہ شیئر کر رہے ہیں اور اس پر دلچسپ تبصرے بھی کیے جا رہے ہیں۔

پہلے سیمی فائنل میں اسپین نے شاندار کارکردگی کا مظاہرہ کرتے ہوئے فرانس کو 2-0 سے شکست دی اور فائنل کے لیے کوالیفائی کر لیا۔ دوسری جانب دفاعی چیمپئن ارجنٹینا نے سخت مقابلے کے بعد انگلینڈ کو 2-1 سے ہرا کر مسلسل دوسری مرتبہ ورلڈکپ کے فائنل میں جگہ بنا لی۔ دونوں بڑی ٹیموں کی کامیابی کے بعد دنیا بھر میں فٹبال شائقین کا جوش مزید بڑھ گیا ہے۔

سیمی فائنلز کے فوراً بعد سوشل میڈیا پلیٹ فارم ایکس (سابقہ ٹوئٹر) پر جولائی 2021 میں کی گئی ایک پوسٹ تیزی سے وائرل ہونے لگی۔ اس پوسٹ میں ایک صارف نے دعویٰ کیا تھا کہ فیفا ورلڈکپ 2026 کا فائنل ارجنٹینا اور اسپین کے درمیان کھیلا جائے گا۔ حیران کن بات یہ ہے کہ پوسٹ میں فائنل کے ممکنہ اسکور کا بھی ذکر کیا گیا تھا، جس کے مطابق ارجنٹینا 3-2 سے کامیابی حاصل کر کے عالمی چیمپئن بنے گا۔

Argentina just beat Spain at the 2026 World Cup final, 3-2.

— dilemma (@actuallyimthe) July 11, 2021

یہ پوسٹ دوبارہ سامنے آنے کے بعد سوشل میڈیا پر مختلف آراء سامنے آ رہی ہیں۔ کچھ صارفین کا کہنا ہے کہ اگر فائنل کا نتیجہ بھی اسی انداز میں آیا تو یہ حالیہ برسوں کی سب سے حیران کن پیشگوئی ثابت ہوگی۔ دوسری جانب کئی افراد اسے محض ایک اتفاق قرار دے رہے ہیں اور ان کا کہنا ہے کہ کھیل میں کسی بھی نتیجے کی پیشگی ضمانت نہیں دی جا سکتی۔

فٹبال تجزیہ کاروں کے مطابق دونوں ٹیمیں اس وقت بہترین فارم میں ہیں۔ ارجنٹینا اپنے عالمی اعزاز کا دفاع کرنے کے لیے پُراعتماد دکھائی دے رہی ہے، جبکہ اسپین کئی سال بعد ایک مرتبہ پھر عالمی ٹائٹل جیتنے کے مضبوط ارادے کے ساتھ میدان میں اترے گا۔ دونوں ٹیموں کے پاس تجربہ کار اور باصلاحیت کھلاڑی موجود ہیں، جس کے باعث فائنل کو حالیہ برسوں کے بہترین مقابلوں میں شمار کیا جا رہا ہے۔

اب پوری دنیا کے کروڑوں فٹبال شائقین کی نظریں فیفا ورلڈکپ 2026 کے فائنل پر مرکوز ہیں۔ شائقین صرف نئے عالمی چیمپئن کا انتظار نہیں کر رہے بلکہ یہ بھی دیکھنا چاہتے ہیں کہ پانچ سال پہلے کی گئی وائرل پیشگوئی درست ثابت ہوتی ہے یا نہیں۔